Jarkenttegi janar-jaǵarmaı quıý stantsııasynda qarý-jaraq saqtalǵan

TALDYQORǴAN. QazAqparat – Jarkentte janar-jaǵarmaı quıý stantsııasynda qarý-jaraq saqtalǵan oryn tabyldy, dep habarlaıdy QazAqparat tilshisi.

Polıtseıler UQKD qyzmetkerlerimen birlese otyryp, Panfılov aýdany Jarkent qalasynyń mańyndaǵy qaraýsyz qalǵan janar-jaǵarmaı quıý stantsııasynda qos aýyzdy sholaq myltyq, sondaı-aq 9 patronmen birge «STREAMER 1014» travmatıkalyq tapanshasy saqtalǵan jasyryn oryndy tapty.

Atalǵan fakti boıynsha tergeý amaldary bastaldy. Tabylǵan qarý saraptamaǵa jiberildi.

«Zańsyz saqtalǵan qarýdy, sondaı-aq oǵan negizgi (quramdas) bólikterin óz erkimen tapsyrǵan azamattar, eger olardyń is-áreketterinde basqa quqyq buzýshylyq quramy bolmasa, jaýapkershilikten bosatylatynyn esterińizge salamyz», - delingen Jetisý oblystyq polıtsııa departamenti baspasóz qyzmetiniń habarlamasynda.