Jarkenttegi dala órtine baılanysty qylmystyq is qozǵaldy
TALDYQORǴAN. QazAqparat - Almaty oblysynyń Panfılov aýdanyndaǵy dala órtine baılanysty qylmystyq is qozǵaldy. Esterińizge sala keteıik, qyzyl jalyndy óshirip júrip úsh adam qaza tapqan bolatyn, dep habarlaıdy QazAqparat tilshisi.
«Keshe órttiń janynan úlken qazanshuńqyr qazylyp, Ósek ózeninen sý alynǵan bolatyn. Sol qazanshuńqyrdyń arqasynda órtti aýyzdyqtaý múmkin boldy. Búgingi tańda órttiń ary qaraı jaıylý qaýpi joq. Qutqarýshylardyń sózinshe, órt aqyryndap túnge deıin ózi sónýi kerek. Osy oqıǵaǵa baılanysty Qylmystyq kodekstiń 292-baby 3-tarmaǵy boıynsha is qozǵaldy», - dedi Almaty oblysy ákiminiń baspasóz hatshysy Ǵalymurat Júkel.
Panfılov aýdany ákiminiń orynbasary Shýhrat Qurbanovtyń aıtýynsha, órtenip jatqan jer Jarkent qalasynan 50 shaqyrym jerde taýly aımaqta ornalasqan. Ol mańǵa atpen, kólikpen jetý qıyn. Biraq memlekettik qyzmetker órttiń aýyl aımaqtaryna taralý qaýpi joq dep sendirdi. Esterińizge sala keteıik, 5 tamyz kúni Panfılov aýdanynda dala órtin óshiremin dep qaza tapqan úsh adamnyń ekeýi jerlendi. Búgin ormanshy bolyp jumys istegen 32 jastaǵy Erkinbek Ospanovty jaqyndary sońǵy saparǵa shyǵaryp saldy.
Buǵan deıin, órtten úsh adamnyń qaza taýyp, 7 adamnyń zardap shekkenin habarlaǵan bolatynbyz. Almaty oblysy ákiminiń baspasóz hatshysy Ǵalymurat Júkeldiń málimetinshe, marqum bolǵan úsh azamat memlekettik nagradaǵa usynylady.
Panfılov aýdanynda dala órtin óshirmek bolyp, jan tapsyrǵan Qanat Úsenbekov pen Erkinbek Ospanovtyń árqaısysynda bes baladan bolǵan.
