Jarkenttegi atys: Adam óltirýge oqtalý isi boıynsha eki kúdikti ustaldy
ASTANA. KAZINFORM — Jarkent qalasynda er adamdar arasyndaǵy eregis kezinde atys qarýy qoldanylǵan, qazir osy is boıynsha qylmystyq tergeý júrip jatyr, dep habarlaıdy Kazinform tilshisi.
Jetisý oblystyq polıtsııa departamentiniń málimetinshe, osy oqıǵaǵa qatysty buzaqylyq jáne kisi óltirýge oqtalý boıynsha qylmystyq ister qozǵaldy.
— Burynnan tanys er adamdar arasynda qaqtyǵys týyndap, sonyń saldarynan olardyń biri atys qarýyn qoldanǵany aldyn ala anyqtaldy. Oq tıgen 33 jastaǵy er adam aýrýhanaǵa jatqyzylǵan, — dep málimdedi polıtsııa.
Tergeý barysynda quqyq qorǵaý organdarynyń qyzmetkerleri oqıǵa kezinde qoldanylǵan bolýy múmkin qarýdy tárkiledi. Eki kúdikti ustalyp, ýaqytsha ustaý ızolıatoryna qamaldy.
Polıtsııa qarýdyń memlekettik organdarmen baılanysty adamǵa tıesili ekendigi týraly áleýmettik jelilerde taralǵan aqparatqa bólek túsinikteme berdi.
— Qoldanylǵan atys qarýy memlekettik organdarmen baılanysty adamǵa tıesili ekendigi týraly aqparat jalǵan, — dep málimdedi departament.
Jetisý oblystyq polıtsııa departamenti sondaı-aq zań kórineý jalǵan aqparat taratqany úshin jaza belgilengeni týraly eskertti. Jaǵdaıǵa jáne quqyq buzýshylyqtyń sıpatyna baılanysty mundaı áreketter qylmystyq jaýapkershilikke, sonyń ishinde jeti jylǵa deıin bas bostandyǵynan aıyrýǵa ákep soqtyrýy múmkin.
Tergeýdi Jetisý oblysy polıtsııa departamentiniń basshylyǵy baqylap otyr.
AQSh-ta atys bolyp, toǵyz adam qaza tapty.
https://kaz.inform.kz/news/aksh-ta-atis-bolip-togiz-adam-kaza-tapti-cef1f01f/
Nurlan Tuıaqov
