Jarkentte shekarashy balabaqshadaǵy búldirshinderdi órtten qutqardy
JARKENT. QazAqparat - Jarkentte shekarashy Erden Nuraqynov órtengen balabaqshadan búldirshinderdi aman alyp qaldy. Alaıda onyń erligi jaıly bir apta ótken soń ǵana belgili bolyp, áleýmettik jelilerde talqylana bastady, dep habarlaıdy QazAqparat tilshisi.
Aıta keteıik, buǵan deıin Jarkentte balabaqsha órtengeni týraly jazǵan bolatynbyz. Bul oqıǵada «Qorǵas» shekaralyq baqylaý bóliminde ornalasqan «Nurly jol» shekaralyq baqylaý bólimshesiniń 23 jastaǵy áskerı qyzmetshisi Erden Nuraqynov erlik kórsetti.
QR Ulttyq qaýipsizdik komıteti baspasóz qyzmetiniń habarlaýynsha, 2019 jyldyń 16 qańtarynda Jarkent qalasy Pýshkın kóshesindegi jeke úıde ornalasqan balabaqshada keshki saǵat 17-18-der shamasynda órt shyqqan. Otqa oranǵan ǵımaratta balabaqshanyń tárbıeshileri, balalar men ata analary bolǵan.
«Jaqyn mańnan ótip bara jatqan Erden Nuraqynov balabaqshadan shyqqan órtti baıqap, birden búldirshinderdi qutqarýǵa umtylady. Ol eń birinshi kezekte as bólmege kirip, onda úlken gaz ballonyn kórip, ony syrtqa shyǵaryp úlgergen. Sosyn ǵımaratqa qaıta kirip, aldymen elektr transformatoryn ajyratyp, jalyn sharpyǵan bólmelerden balalardy alyp shyǵýǵa jantalasa júgiredi. Tilsiz jaý órtke qarsy bólimsheniń kúshimen jarty saǵattan soń sóndirildi. 79 adam órtten qutqaryldy, onyń 59-y balalar» delingen baspasóz baıanynda.
Osy oqıǵadan birneshe kún ótkennen keıin balabaqsha qyzmetkerleri men ata-analar Instagram, Whatsapp áleýmettik jelileri arqyly Erden atty shekarashyǵa alǵystaryn jaýdyrdy.
Erden Nuraqynovtyń ózi bolsa bul áreketin erlik dep sanamaıdy. «Bundaı oqıǵaǵa tap bolǵan kez kelgen adam osyndaı qadam jasar edi»,- deıdi ol.
