Jarkentte oıyn klýbynyń aqshasyn tonaǵandar ustaldy
Almaty oblysynyń polıtseıleri oıyn klýbynan mıllıon teńgeden astam qarajat urlaǵan qarýly qaraqshylardy jedel túrde anyqtap, ustady.
«Aǵymdaǵy jyldyń 15 qarashasynda saǵat 04:00 shamasynda Panfılov aýdany PB-niń kezekshi bólimine Jarkent qalasyndaǵy oıyn klýbyna qarýly qaraqshylyq shabýyl jasalǵany týraly habarlama kelip tústi. Qaraqshylar bir mıllıonnan astam teńgeni ıemdenip ketken. Aryzdanýshylar qylmyskerlerdiń tapanshamen qarýlanǵanyn jáne qorqytý maqsatynda joǵaryǵa qarata bir ret oq atqandaryn jetkizgen.Atalǵan fakt QR QK-niń 192-babynyń 2-bóligi 1, 4-tarmaqtary boıynsha SDTBT-de tirkeldi.
Oqıǵa ornyna jetken jedel-tergeý toby aqparatty rastady.Tekserý barysynda qylmys ornynan dıametri 9 mm bolatyn atys gılzasy tabyldy. Keshendi jedel-izdestirý is-sharalarynyń nátıjesinde Jarkent qalasynyń turǵyndary bolyp tabylatyn úsh kúdiktini Almaty qalasynyń ártúrli jerlerinen (qonaq úıden, jaldamaly páterden jáne kósheden) anyqtap, ustady»,- delingen Almaty oblystyq Polıtsııa departamenti baspasóz qyzmetiniń habarlamasynda.
Vedomstvonyń aqparatyna sáıkes, ustaý kezinde 20 jastaǵy kúdiktiden urlanǵan aqshanyń jartysy men tapansha tárkilendi. Somanyń taǵy bir bóligi 22 jastaǵy ekinshi kúdiktiden jáne olardyń 23 jastaǵy seriktesinen alyndy.
«Barlyq ustalǵan azamattar dáleldermen áshkerelenip, qalǵan aqshany oıyn-saýyqqa jumsaǵanyn jetkizip, qylmys jasaǵandaryn moıyndady.Qaskúnemderdiń áreketteri beınekameralarǵa túsip qalǵan. Barlyq úsh fıgýrant QR QІJK 128-babyna sáıkes bultartpaý sharasyn tańdaý týraly másele sheshilgenge deıin ÝUO-ǵa qamaqqa alyndy.QR QІJK 201-babyna sáıkes ózge aqparat jarııa etilmeıdi», - dedi Almaty oblysy PD TB bastyǵynyń orynbasary polıtsııa polkovnıgi Samal Arǵynǵazynova.