Jarkentte koronavırýsqa baılanysty daıyndalǵan oryndar aýysatyn boldy - ákimdik
TALDYQORǴAN.QazAqparat - Almaty oblysy Panfılov aýdanyndaǵy Jarkent qalasynda koronavırýsqa baılanysty daıyndalǵan jatahanalardaǵy oryndar basqa jerge aýystyrylady, dep habarlaıdy QazAqparat tilshisi.
«Qytaı Halyq Respýblıkasynda koronavırýstyq ınfektsııanyń jańa túriniń bastalýy jáne ınfektsııanyń ákelinýi men taralýyn boldyrmaý negizinde, Qazaqstan Respýblıkasynyń halyqtyń sanıtarlyq-epıdemıologııalyq salaýattylyǵyn qamtamasyz etý maqsatynda, Qazaqstan Respýblıkasy Bas memlekettik sanıtarynyń sheshimine sáıkes 2020 jyldyń 20 aqpannan bastap Qytaı Halyq Respýblıkasynan kelgen adamdar 14 kún boıy arnaıy statsıonarda oqshaýlanady.
Osyǵan qaraı Jarkent qalasynda arnaıy 100 oryn daıyndalýda. Buǵan deıin Jarkent gýmanıtarlyq joǵary kolledji men Jarkent kóp salaly kolledjderiniń jataqhanalarynda qarastyryrylǵan oryndar basqa jerge aýystyrylatyn bolady. Atalǵan oryndar oqý oryndarynan basqa turǵyndarmen qarym-qatynasta bolmaıtyn jerde qarastyrylady»,- delingen Panfılov aýdanynyń ákimdiginiń resmı taratqan habarlamasynda.
Vedomstvonyń baspasóz qyzmetiniń málimetinshe, jańa oryndar barlyq sanıtarlyq talapqa saı bolady.
«Osyǵan qaraı turǵyndardyń alańdaýyna negiz joq. Bul aldyn ala atqarylyp jatqan turǵyndardyń densaýlyǵy úshin jasalyp jatqan áreket. Óıtkeni bul vırýsty juqtyrǵan adamnan birden eshqandaı syrqat belgileri baıqalmaýy múmkin. Koronavırýstyń aǵzadaǵy jasyryn kezeńi 14 kúnnen 24 kúnge deıin sozylý faktisi anyqtalǵan. Sondyqtan turǵyndardyńdyń alańdaýyna negiz joq jáne jalǵan aqparattarǵa senbeýlerińizdi suraımyz»,-delingen Panfılov aýdany ákiminiń baspasóz qyzmeti taratqan habarlamada.
