Jarkentte Qazposhtany tonaǵandar ustaldy
Nur-Sultan. QazAqparat - Jarkent qalasyndaǵy «Qazposhta» bólimshesine qaraqshylyq shabýyl jasaǵandar ustaldy, dep habarlaıdy QazAqparat. Bul týraly QazAqparat tilshisine QR ІІM-niń QR Іshki ister mınıstriniń keńesshisi - resmı ókil Nurdildá Oraz málim etti.
QR Іshki ister mınıstrliginiń aqparatyna sáıkes, 24 aqpanda poshta bólimshesinen 300 mıllıon teńge urlanǵan bolatyn.
«Qylmysqa qatystylardy anyqtaý jumystaryna óńirdiń barlyq polıtsııa kúshteri jumyldyryldy. Sonyń nátıjesinde qylmys jasaýǵa kúdikti degen Jarkent qalasynyń eki turǵyny anyqtaldy.
Urlanǵan aqsha kúdiktilerdiń bireýiniń úıinde arnaıy jabdyqtalǵan qupııa jerde jáne sharýashylyq úı-jaıdan tabyldy. Atalǵan fakti boıynsha tergep-tekserý jumystary júrgizilýde jáne ol ІІM-niń baqylaýyna alynǵan», - dedi baspasóz qyzmetiniń mamandary.
