Jarkentte dala órtinen qaza tapqandardyń jaqyndaryna nagradalar tapsyryldy
TALDYQORǴAN. QazAqparat - Almaty oblysynyń Panfılov aýdanynda dala órtin óshirmek bolyp qaza tapqandar memlekettik nagradamen marapattaldy. Marqum bolǵan Qanat Úsenbekov, Erkinbek Ospanov jáne Aıtqazy Nemeltaevtyń jaqyndaryna «Erligi úshin» medalin Almaty oblysynyń ákimi Amandyq Batalov tabystady, dep habarlaıdy QazAqparat tilshisi.
Sondaı-aq órtti óshiremin dep zardap shekken 7 azamat Іshki ister mınıstrligi atynan «Órt sóndirýdegi kórsetken erligi úshin» medalimen marapattaldy.
Esterińizge sala keteıik, Almaty oblysynyń Panfılov aýdanynda dala órtin óshirmek bolyp, jan tapsyrǵan Qanat Úsenbekov pen Erkinbek Ospanovtyń artynda 10 balasy - jetim, jarlary - jesir qaldy. Eki er azamattyń da bes balasy bar. Qanat Úsenbekov Panfılov aýdandyq ákimdiginde kólik júrgizýshi bolyp jumys istegen. Qaıǵyly jaǵdaı bolǵan sátte ol eńbek demalysynda júrgen. Ákesiniń aıtýynsha, Qanat órtti óshirýge erikti bolyp barǵan.
Qaza bolǵan jandardyń biri Lesnovka aýylynyń 51 jastaǵy turǵyny Aıtqazy Nemeltaev. Ákimdiktiń málimetinshe, marqum otbasyn qurmaǵan, jumyssyz. Al ormanshy bolyp jumys istegen 32 jastaǵy Erkinbek Ospanovtyń da artynda bes balasy, jary qaldy.
Esterińizge sala keteıik, 6 tamyz kúni Panfılov aýdanynda dala órtin óshiremin dep qaza tapqan úsh adamnyń ekeýi jer qoınyna tapsyrylǵanyn habarlaǵan bolatynbyz. Al marqum bolǵan Erkinbek Ospanovty jaqyndary 7 tamyz kúni sońǵy saparǵa shyǵaryp saldy.
Buǵan deıin, ıaǵnı, 5 tamyz kúni órtten úsh adamnyń qaza taýyp, 7 adamnyń zardap shekkenin habarlaǵan bolatynbyz.
Úsh adamnyń ómirin jalmaǵan Panfılov aýdanyndaǵy dala órti 10 kúnnen keıin ǵana aýyzdyqtalǵan edi.
«Panfılov aýdany aýmaǵyndaǵy Órkensaı, Kúıeli, Qoıtas ýchaskelerinde qyzyl jalyn sharpyǵan aýmaq shamamen 455 gektardy quraǵan. Sondaı-aq memlekettik orman qory aýmaǵyndaǵy órttiń aýmaǵy 17 gektarǵa jetken. Tilsiz jaýmen kúresýge kúndelikti 50 shaqty adam qatysyp otyrǵan. Órtti sóndirýge tikushaqtarmen 84 ret áýeden sý tógildi. 13 tamyz kúni 11 saǵat 15 mınýtta órt tolyǵymen aýyzdyqtaldy», - delingen Almaty oblystyq TJD baspasóz qyzmeti taratqan aqparatta.
