Jarkentte Abaıdyń ulaǵatyn uǵyndyrǵan shara ótti
Uly Abaıdyń bilim men ǵylymǵa, óner men eńbekke úndegen aqyl-ósıetke toly jyrlary men qara sózderin urpaq sanasyna sińirýdi maqsat etken bul vebınardy Jarkent joǵary gýmanıtarlyq-tehnıkalyq qolledjiniń dırektory B. Saýranbaeva kirispe sóz sóılep ashty.
Úsh baǵyt boıynsha ótken sharanyń «Abaı muralarynyń pedagogıkalyq qundylyǵy» atty birinshisinde kolledj dırektorynyń ǵylymı ádistemelik ister jónindegi orynbasary K. B. Qurabaldıeva men kolledjdegi qazaq tili men ádebıetiniń magıstri, «Abaıtaný» úıirmesiniń jetekshisi R. Qojabergenova, al, «Abaıdyń «Tolyq adam» tujyrymdamasy» ekinshi baǵyty boıynsha Taldyqorǵan qalasyndaǵy І. Jansúgirov atyndaǵy Jetisý memlekettik ýnıversıtetiniń oqytýshysy, fılologııa ǵylymdarynyń kandıdaty S.Q. Qojaǵulov, osy joǵarǵy oqý ornynyń doktaranttary M.B.Tumanbaeva men E.Sovet, «Abaıdy bilmek paryz oıly jasqa» atty úshinshi baǵyt boıynsha abaıtanýshy, aqyn, Qazaqstan Jazýshylar odaǵynyń múshesi Almahan Muhamedqalıqyzy, «Jıdebaı-Bórili» memlekettik tarıhı-mádenı jáne ádebı memorıaldyq qoryq mýzeıiniń dırektory, fılologııa ǵylymdarynyń kandıdaty Shańbaı Turdyqul Qasenuly taǵylymy tereń sóz sóılep, qoıylǵan suraqtarǵa jaýap berdi.
Shara sońynda kolledj stýdentteri uly aqynnyń óleńderin naqyshyna keltire oqyp, ásem ánderin asqaqtata shyrqady.
