Jarkent jurty búlikshiler qolynan qaza tapqan kýrsant Jaıyq Adylqandy jer qoınyna tapsyrdy

TALDYQORǴAN. QazAqparat- Jarkent jurty búlikshiler qolynan qaza tapqan shekara akademııasynyń 2 kýrsanty, efreıtor Adylqan Jaıyq Ýgýlhanulyn aqtyq saparǵa shyǵaryp saldy, - dep habarlaıdy QazAqparat tilshisi.

Panfılov aýdany Eńbekshi aýylynyń turǵyny Jaıyq Ýgýlhanuly bir úıdiń jalǵyz uly. 22 jastaǵy azamat óz boryshyn sońyna deıin adal atqardy.

2018 jyly mektep bitirgen ol 2019 jyly Qordaı shekara otrıadynyń 2038 áskerı bóliminde Otan aldyndaǵy boryshyn ótegen. 2020 jyly UQK Shekara akademııasyna oqýǵa túsken.

Panfılov aýdanynyń ákimi Talǵat Ómirálıev, shekara akademııa ujymy jáne aýyl turǵyndarymen birge marqumdy týǵan aýyly Eńbekshige jer qoınyna tapsyrdy.

«Jaıyq eldikti, táýelsizdikti qorǵady. Jas bolsa da óziniń jaýyngerlik antyna, eline prezıdentke adal boldy. Kózsiz erligi árqashan bizdiń jadymyzda. Esh umytpaımyz. Marqumnyń otbasyna jáne týys-týǵandaryna óz atymnan jáne aýdan halyqy atynan qaıǵyra kóńil aıtamyn», - dedi aýdan basshysy.

Jaıyq Adylqan 4-7 qańtar aralyǵynda QR UQK Shekara Akademııasynyń kýrsanttarymen Almaty qalasyndaǵy strategııalyq mańyzdy nysandardy qorǵaýǵa qatysqan. Kýrsanttarmen «Kóktóbe» telemunarasy da qorǵaıdy. Osy qorǵanysta kýrsanttar búlikshilerdiń shabýylyna birneshe ret toıtarys berdi. Alaıda telemunara men akademııa arasyndaǵy urysta Jaıyq búlikshiler qolynan qaza tapty.

Osy erligi úshin QR Prezıdenti lll dárejeli «Aıbyn» ordenimen marapattady.