Jarkent turǵyny telefon qońyraýyna jaýap bermegen qyzdyń úıin órtep jiberdi degen kúdikpen ustaldy
Panfılov aýdany polıtsııa bóliminiń aqparatyna qaraǵanda, 8 qarasha kúni 60 jastaǵy er adam belgisiz bireýdiń úıin órtep jibergenine shaǵymdanyp, kináli adamdy jaýapqa tartýdy suraǵan. Jábirlenýshi aldyn ala keltirilgen zalaldy 25 mln teńgege baǵalady.
«Polıtsııa bul áreketke 24 jastaǵy jergilikti turǵynnyń qatysy baryn anyqtady. Tergeý barysynda kúdiktiniń sol úıde turatyn qyzben tanys bolǵany anyqtaldy. Qyz telefon qońyraýyna jaýap bermegen. Bul kúdiktiniń ashýy men qyzǵanyshyn týdyrǵan. Sóıtip, ol qyzdyń úıine jasyrynyp kirip, órtep jibergen. Abyroı bolǵanda órttiń kórshilerdiń úılerine jaıylýyna jol berilgen joq», - dep habarlady aýdandyq polıtsııa bóliminen.
QR QK 202-babynyń 2-bóliminde kózdelgen «qasaqana órteý» áreketi boıynsha sotqa deıingi tergeý bastaldy. Qajetti saraptamalar taǵaıyndaldy. Ustalǵan adamǵa qatysty «kelýge mindetteý» protsessýaldyq májbúrleý sharasy tańdaldy.
