Jarkent óńirinde áıelderdiń 30%-y kásipkerlikpen aınalysady
TALDYQORǴAN. QazAqparat - Jarkent óńirinde áıelderdiń 30%-y kásipkerlikpen aınalysady. Bul týraly Almaty oblysy Panfılov aýdanynda Іsker áıelder keńesi men Іsker áıelder qaýymdastyǵynyń jyl qorytyndysy barysynda málim boldy, dep habarlaıdy QazAqparat.
Bıznes-hanymdardyń forýmynda sóz sóılegen Panfılov aýdanynyń ákimi Berdáýlet Abdýldaev áıelderdiń kásipkerlik qaýymdastyǵy aýdan ekonomıkasynyń damýyna zor úles qosqanyn atap aıtty. Onyń sózine qaraǵanda, búginde aýdandaǵy kásipker áıelder aýyl sharýashylyǵynda, farmatsevtıkada, bilim salasynda belsendi jumys jasap jatyr. Bıznes-qurylymdardyń salyq tólemderi aýdandyq bıýdjettiń 45%-yn qurap otyr, 22 myń adam jumyspen qamtylǵan. Sonymen qatar, qazirgi tańda Jarkent óńirinde 62 myń áıel bar, olardyń 30%-y bıznespen shuǵyldanady.
Al Panfılov aýdanynyń Іsker áıelder qaýymdastyǵy men Іsker áıelder keńesiniń fılıal basshysy Sýrııam Іzimovanyń aıtýynsha, aýdandaǵy áıel kásipkerler jyl ótken saıyn kóbeıip keledi. «Bizdiń áıelder osy jyldar ishinde aýdan ekonomıkasyna 1,5 mlrd teńge tabys túsirdi, jańa kásiporyndar men jumys oryndary ashyldy. Máselen áriptesimiz Mahınur Aıýpova jańa naýbaıhana ashty, naýbaıhanasy zamanaýı tehnıkamen jaraqtalǵan. Banýlıa Razıeva memlekettik baǵdarlama arqasynda mal sharýashylyǵyn damytyp otyr. Balsheker Jápisheva bıznesin keńeıtip, jańa dámhana ashty. Mundaı mysaldar jetip artylady», dedi Sýrııam Іzimova. Kásipker Ulbolsyn Amanbaeva «Qorǵas» shekara mańy yntymaqtastyq halyqaralyq ortalyǵy aýmaǵynda saýda jasap júr. Aıgúl Álimjan Qytaıdan ınvestor taýyp, jún óńdeýmen aınalysýdy kózdep otyr.
Almaty oblysy Іsker áıelder qaýymdastyǵynyń tóraıymy Rımma Salyqova basshylaryna kásipkerlikti qoldaǵandary úshin alǵys aıtyp, Berdáýlet Abdýldaevqa «25 izgi istiń kerýeni» músinin syıǵa tartty.
