Jarkent meshiti men Voznesensk shirkeýi ıÝNESKO-nyń búkilálemdik mura nysandarynyń aldyn ala tizimine endi

ASTANA. KAZINFORM - Memleket basshysynyń Ulttyq quryltaıdyń Qyzylorda qalasynda ótken besinshi otyrysynda bergen tapsyrmasyn oryndaý aıasynda Jarkent meshiti jáne Voznesensk shirkeýi ıÝNESKO-nyń búkilálemdik mura nysandarynyń aldyn ala tizimine engizildi (Tentative List).

Bul týraly óziniń Facebook paraqshasynda QR Memlekettik keńesshisi Erlan Qarın jazdy.

Jarkent meshiti HІH ǵasyr sońyndaǵy dinı sáýlet óneriniń biregeı eskertkishi sanalady. Sonymen qatar, ony ıslam sáýlet dástúri men Shyǵys Azııa qurylys óneri sınteziniń jarqyn mysaly deýge bolady.

Injenerlik jáne kórkemdik ádis-tásilderimen tanymal bolǵan Voznesensk shirkeýi – HH ǵasyrdyń basyndaǵy pravoslav aǵash sáýlet óneriniń ozyq úlgisi.

- Bul nysandardyń tizimge birge usynylýy Qazaqstanda mádenı áralýandyqtyń bar ekenin ańǵartady. Sondaı-aq, Ortalyq Azııa aımaǵynda ıslam jáne hrıstıan dástúrleriniń úılesimdi túrde qatar damyǵanyn, bir-birine yqpal etýdiń tarıhı tájirıbesi qalyptasqanyn kórsetedi, - delingen habarlamada.

Sondaı-aq onda meshit pen shirkeýdiń aldyn ala tizimge engizilýi – Qazaqstannyń mádenı muralaryn saqtaý jáne olardy dáripteý isiniń mańyzdy kezeńi ekeni aıtylǵan. Bul qadam ıÝNESKO-nyń rásimderi men talaptaryna sáıkes nomınatsııa qujattaryn ázirleýge negiz bolady.

Osyǵan deıin Memleket basshysy Qasym-Jomart Toqaev ıÝNESKO-nyń búkilálemdik muralar tiziminde bolýǵa laıyq jádigerlerdi ataǵan bolatyn.