Jarqaıyń aýdanynda baǵany ustap turý boıynsha 20 memorandým jasaldy- Aqmola oblysy
KÓKShETAÝ. QazAqparat - Aqmola oblysynyń Jarqaıyń aýdanynda azyq-túlik taýarlarynyń baǵasy qalaı tejeledi. Bul týraly jýrnalıstermen ótken brıfıngte aýdan ákimi Janbolat Hamıtov aıtty, dep habarlaıdy QazAqparat tilshisi.
Ekonomıkanyń naqty sektorynda Jarqaıyń aýdanynyń ónerkásiptik kásiporyndary 2,5 mlrd teńgeden astam ónim óndirdi. Bul rette naqty kólem ındeksi 125 paıyzdy qurady.
Aýdan ákimi atap ótkendeı, orta jáne shaǵyn bıznes salasynda 1171 kásipkerlik sýbektisi bar, onda 3300-den astam adam jumys isteıdi, 135 jańa jumys orny ashyldy. Azyq-túlik taýarlarynyń negizgi túrlerine baǵany ustap turý boıynsha 20 memorandým jasaldy.
«Nan baǵasyn turaqtandyrý úshin aýyl sharýashylyǵy taýar óndirýshilerimen 1 ga egis alańyna 60 teńge esebinen «Jarqaıyń Agro» QB-ǵa qarajat aýdarý boıynsha memorandýmdar jasaý boıynsha jumys júrgizilýde. Barlyq qajetti rásimder aıaqtalǵannan keıin nan óndirýshiler sýbsıdııalanady. Nátıjesinde nan baǵasy bir bólke úshin 95-105 teńgeni quraıtyn bolady», - dep atap ótti J.Hamıtov.
Aýdan ákiminiń aıtýynsha, et jáne sút ónimderiniń baǵasyn turaqtandyrý úshin aýdan ortalyǵynda jármeńkeler únemi ótkizilip turady, onda ónimder naryqtaǵydan 15-20 paıyzǵa tómen baǵamen satylady. Jyl basynan beri aýdan ortalyǵynda eki jármeńke ótkizilip, 12,8 mln.teńgeden astam somaǵa aýyl sharýashylyǵy ónimderi satyldy. 2021 jylǵy 31 qazanda aýdan Nur-Sultan qalasynda ótkiziletin jármeńkege qatysady dep josparlanýda.
