Jarqaıyń aýdanynda 5 ınvestjoba júzege asyrylmaqshy-Aqmola oblysy
KÓKShETAÝ. QazAqparat – Aqmola oblysynyń Jarqaıyń aýdanynda 5 ınvestıtsııalyq joba sheńberinde áleýmettik ınfraqurylym jáne agroónerkásip salasynda jańa nysandar ashylady.
Bul týraly óńirlik kommýnıkatsııalar qyzmetinde ótken brıfıngte aýdan ákimi Murat Balpan aıtty, dep habarlaıdy QazAqparat tilshisi.
Ákimniń sózinshe, 2020 jyly Jarqaıyń aýdanyna 5,4 mıllıard teńge ınvestıtsııa tartý josparlanǵan. Osynyń nátıjesinde Tasótkel aýylynda qýaty 3 tonnalyq sút tsehy, Derjavınsk qalasynda 5 myń tonnalyq elevator, 20 myń tonnalyq elevator jelisi tárizdi jobalar júzege asyrylady.
«Ótken jyldyń qorytyndysy boıynsha aýdanda aýyl sharýashylyǵy ónimderiniń ónim kólemi 39,2 mıllıard teńgeni qurady. Ekonomıkanyń naqty sektory ónerkásip óndirisi salasynda 3,1 mıllıardtan astam teńgeniń ónimi shyǵaryldy. Mal sharýashylyǵy salasyn sýbsıdııalaý 38,7 mıllıon teńgeni qurady. Tasótkel aýylynda otbasylyq túrinde asyl tuqymdy 50 bas sıyrǵa arnalǵan taýarly-sút fermasy ashyldy», - dedi aýdan ákimi M.Balpan.
Sonymen qatar, aýdan basshysy turǵyn úı-kommýnaldyq sharýashylyǵy, sýmen jabdyqtaý jáne kóliktik ınfraqurylymdy damytý, halyqty jumyspen qamtý jáne áleýmettik qorǵaý máselesine de toqtaldy.
«Ótken jyly 594 jańa jumys orny ashyldy, onyń-340 aýyldyq jerlerde. Jumyssyz júrgen 682 adam turaqty jumysqa ornalastyryldy. Jumysshylardyń ortasha aılyǵy 112 391 teńgeni quraıdy. Budan bólek, «Eńbek» baǵdarlamasy boıynsha 21 adam barlyǵy 85 mıllıon teńge nesıe aldy», - dep túıindedi M.Balpan.
