Jarysta moıyn omyrtqasyn syndyrǵan jas sportshynyń qazirgi jaǵdaıy qalaı

ASTANA. KAZINFORM — Jasóspirim sportshy aýrýhanaǵa aýyr halde túsken. Osy oraıda Astana qalasynyń Qoǵamdyq densaýlyq saqtaý basqarmasynan jasóspirimniń qazirgi jaǵdaıyn suraǵan edik.

— 2010 jylǵy jasóspirim sanıtarlyq avıatsııamen shuǵyl Astana qalasyndaǵy № 2 kópsalaly qalalyq balalar aýrýhanasyna jetkizildi. Naýqas qabyldanǵan sátten bastap birden Densaýlyq saqtaý mınıstrliginiń bas balalar neırohırýrginiń qatysýymen konsılıým ótkizildi, — degen habar aldyq basqarmanyń baspasóz qyzmetinen.

Aqparatta aıtylǵandaı, jasóspirimge qysqa merzimde qarqyndy terapııa jasalǵan. 

— Qazir patsıent anestezıologııa, reanımatsııa jáne qarqyndy terapııa bólimshesinde em alyp jatyr, — deıdi vedomstvodan.

Aıta ketsek, keshe Aqmola oblysynda 15 jastaǵy sportshy jarysta moıyn omyrtqasyn syndyryp, aýyr halde aýrýhanaǵa túskeni týraly jazǵan edik. 

Aqmolalyq dárigerler jas sportshynyń jaǵdaıyn aýyr dep baǵalap otyr. Bala sanıtarlyq avıatsııa kómegimen Astanaǵa jetkizildi.