Jaryssóz: Qýandyq Bıshimbaevty qorǵaýshylary qalaı aqtap jatyr

ASTANA. KAZINFORM – Elordada Qýandyq Bıshimbaevqa qatysty qylmystyq is jalǵasýda. Búgingi sot otyrysynda eks-sheneýniktiń qorǵaýshylary aıyptyny aqtaýǵa tyrysyp jatyr.

«Q. Bıshimbaev S.Núkenovanyń óliminen qandaı da bir paıda kórýi tıis? Bul jerde qandaı paıda týraly aıtylyp tur? Aıyptaý aktisinde bul suraqtyń jaýaby joq. Aktide «Men óltirgim keldi» delingen biraq ne úshin? Prokýror bul saýalǵa jaýap bermedi, tek «nartsıssıst», «agressor» taǵy sol sııaqty bulyńǵyr sózdermen jabylǵan. Eger Q. Bıshimbaev kisi óltirýdi oılasa, ol muny óz qolymen jasar ma edi?», - dedi Q. Bıshimbaevtyń advokaty Erlan Ǵazymjanov.

«Keltirilgen dálelder Qýandyqtyń azaptaýǵa kinásiz ekenin rastaıdy. Munda advokat Vranchev Qýandyqty halyqtyń 30 jyldyq azaby úshin qurbandyqqa shalý kerek dedi. Oǵan nege Qýandyq jaýap berýi kerek? 30 jyl buryn Qýandyq 10 jasta edi. Biz Qýandyq Bıshimbaevty emes, zańdy qorǵaımyz. Qýandyq ornynda kez kelgen emotsıonaldy teńgerimsiz adam bolýy múmkin», - dedi aıyptalýshynyń kelesi advokaty Leıla Ramazanova.

Sondaı-aq, qorǵaýshy Q. Bıshimbaev S. Núkenovaǵa baǵaly syılyq jasap, aı saıyn aqsha aýdarǵanyn aıtty.

«Tergeý barysynda kúdikti B. Baıjanov Saltanat Núkenovaǵa aqsha aýdarǵanyn aıtty. Sondaı-aq, B. Baıjanovtyń aıǵaqtarynan Qýandyq Bıshimbaev Saltanatqa eki ret saǵat satyp alynǵany, onyń quny 6-8 mıllıon teńge turǵany aıtyldy. Q. Bıshimbaev aıtqandaı, ol S. Núkenovǵa aqsha aýdarǵan. Eń az soma «Kaspi» derekteri boıynsha aıyna 500 myń teńgeden astam boldy», - dedi L. Ramazanova.

Qazir jaryssóz jalǵasýda.

Aıta ketsek, 29 sáýirde saǵat 10:00-de bastalýy tıis eks-sheneýnik Qýandyq Bıshimbaevqa qatysty sot otyrysy tústen keıinge qaldyrylǵan edi.

Keshe Іshki ister mınıstrdiń orynbasary sáýir aıynda Bıshimbaev sot otyrysyna nege kelmegenin túsindirdi.