Jarys aldynda medalmen oralatynyn aıtty – Olımpıada júldegeri Islam Sátpaevtyń anasy
ALMATY. KAZINFORM – Pnevmatıkalyq vıntovkamen 10 metrge nysana kózdeýden aralas komandalyq synda Islam Sátpaev pen Aleksandra Le Olımpıadanyń qola júldesin jeńip aldy. Osyǵan oraı Kazinform tilshisi Islam Sátpaevtyń anasy Álııa Sátpaevamen habarlasyp, az-kem áńgimelesti.
Álııa Sátpaeva ulynyń jeńisin bilgende kóz jasyna erik bergenin aıtady.
– Tańerteńnen beri teledıdardy qosyp, jarysty kútip otyrdyq. Júlde alǵanyn bilgende jylap qaldym. Qatty qýandym. Balamnyń jeńisine rızamyn. Qazaqstan meniń ulymdy ósirdi. Qazaq eline alǵysym sheksiz, - dedi ol.
Olımpıada júldegeriniń anasy Islam Sátpaevtyń jarys aldyndaǵy daıyndyǵy qalaı ótkenin aıtyp berdi. Onyń sózinshe, sportshy anasyna jarys aldynda elge júldemen oralýǵa ýáde bergen.
– Olar Parıjge deıin oqý-jattyǵý jıyndaryna ketip, sol jaqta qonyp, sol jaqta ómir súrdi. Árdaıym jattyǵýmen júrdi. Daıyndyǵy oıdaǵydaı ótti. Halin surap, habarlasqan kezde maǵan: «Anashym, ýaıymdama, bári durys, daıyndalyp jatyrmyn» dep aıtatyn. Sosyn ol Olımpıadaǵa joldama alǵan kezde qatty qýandy. Parıj ystyq deıdi. Barlyǵy unaǵanyn aıtty. Jarys aldynda «kútińizder, buıyrsa medalmen kelemin» degeni bar, - dedi sportshy anasy.
Sondaı-aq Álııa Sátpaeva ulynyń nysana kózdeý sportyn ózi unatyp, tańdaǵynyn erekshe atap ótti.
– Otbasymyzda eshkim sportshy bolǵan joq. 7 synypta oqyp júrgende osy sportqa ózi bardy. Keıin nysana kózdeý unap, atalǵan sport túrinen jetkistikterge jete bastady, - dedi Álııa Sátpaeva.
