Jarymjan taksısti balaǵattaǵan astanalyqtyń isi sotqa jiberildi

ASTANA. KAZINFORM – Elordada jolaýshy estý qabiletinen aırylǵan taksıske til tıgizip, aýyr sózder aıtqan. Buzaqy qamaýǵa alyndy.

«Estý qabileti buzylǵan taksı júrgizýshisine balaǵat sózder aıtqan jolaýshy dereý anyqtalyp, ustaldy. Qalanyń 38 jastaǵy turǵyny balaǵat sózder aıtqany, qorlaǵany jáne múmkindigi shekteýli adamdy qurmettemegeni úshin jaýapqa tartyldy. Materıal sotqa jiberildi», - delingen qalalyq Polıtsııa departamentiniń habarlamasynda. 

Aqparatta aıtylǵandaı, sot sheshimimen er adam 15 táýlikke qamaýǵa alyndy. Ol Astana qalasy Polıtsııa departamentiniń ákimshilik qamaýǵa alynǵandar úshin arnaıy orynǵa qamaldy.