Jarylý qaýpi bar anevrızma: Astanada júkti áıelge ota jasaldy
ASTANA. KAZINFORM – Elordadaǵy Ulttyq neırohırýrgııa ortalyǵynyń dárigerleri júkti áıeldi jarylý qaýpi bar anevrızmadan qutqardy. Bul týraly elorda ákimdiginiń resmı saıty «Áleýmettik medıtsınalyq saqtandyrý qory» KEAQ Astana qalasy boıynsha fılıalyna silteme jasap habarlady.
«Bul rettegi jaǵdaıdyń kúrdeliligi, júktiliktiń 20-aptasynda neırohırýrgııalyq ota jasaý boıynsha shuǵyl túrde sheshim qabyldaý qajet boldy. Qýanyshtysy, ota sátti ótti, kez kelgen sátte jarylýy múmkin «bomba» zalalsyzdandyryldy. Neırohırýrgtar júrgizilgen jumystyń nátıjesi oıdaǵydaı ekenin aıtty», - dep habarlaıdy «Áleýmettik medıtsınalyq saqtandyrý qory» KEAQ Astana fılıaly.
24 jastaǵy Almaty qalasynyń turǵynyn osy jyldyń aqpan aıynan bas aýrýy mazalaı bastaǵan. Bir aıdan keıin tipti kórý qabileti nasharlap, oń qabaǵynyń tómen túskenin baıqaıdy. Sóıtip, ol medıtsınalyq kómek alý úshin oftalmolog pen nevrologqa júgingen.
Bas aýrýy kúsheıe bastaǵan soń mıdy MRT-ge túsirý usynyldy. MRT-da mıdyń oń jaǵyndaǵy artqy arterııasynyń úlken anevrızmasy anyqtaldy, kólemi ulǵaıǵandyqtan janyndaǵy júıke qurylymdaryn qysyp, kez kelgen ýaqytta jarylyp ketý qaýpin týdyrdy. Bul rettegi jaǵdaıdyń kúrdeliligi, júktiliktiń jıyrmasynshy aptasynda neırohırýrgııalyq ota jasaý boıynsha shuǵyl túrde sheshim qabyldaý qajet boldy.
Almaty jáne Astana qalalary neırohırýrgteriniń birlesken talqylaýynan keıin sanıtarııalyq avıatsııa jelisi boıynsha patsıent jedel emdeý úshin Ulttyq neırohırýrgııa ortalyǵyna jetkizildi.
Ulttyq neırohırýrgııa ortalyǵyna jatqyzǵan kezde naýqasty Ana men bala ulttyq ǵylymı ortalyǵynyń anestezıologtary men akýsher-gınekologtary da tekserýge daıyn boldy. Hırýrgııalyq aralasý men atalǵan aýrýdyń qaýiptiligine qaramastan ota jasaý jáne júktilikti saqtap qalý týraly sheshim qabyldandy.
Qýanyshtysy, ota sátti ótip, kez kelgen sátte jarylýy múmkin «bomba» zalalsyzdandyryldy. Neırohırýrgter júrgizilgen jumystyń nátıjesi oıdaǵydaı ekenin aıtty. Naýqasty emdeýge anestezıolog-reanımatologtar men akýsher-gınekologtar da belsendi qatysty. Otadan keıin, naýqasqa qosymsha zertteýler júrgizgen akýsher-gınekologtar qaıta qarap, tekserýden ótkizdi. Jatyrdaǵy sharana men júktilik barysynda eshqandaı patologııalar anyqtalǵan joq. Qazir bolashaq ananyń densaýlyǵy jaqsy jáne úıine shyǵýǵa daıyndalyp jatyr.
Mı tamyrlarynyń anevrızmasyna ota jasaý mamandardyń joǵary biliktiligin jáne zamanaýı medıtsınalyq jabdyqty qajet etetin eń kúrdeli hırýrgııalyq aralasýlardyń biri sanalady. Otany Tamyrly jáne fýnktsıonaldy neırohırýrgııa bólimshesiniń meńgerýshisi Erbol Mahambetov pen neırohırýrg dáriger Nurtaı Nuraqaı júrgizdi.
Ota naýqasqa tegin, ıaǵnı, MÁMS aıasynda kvota arqyly jasaldy. Mundaı otanyń quny shetel azamattary úshin aqyly negizde shamamen 5 mln teńge bolar edi.
Atap óteıik, bul Ulttyq neırohırýrgııa ortalyǵynyń dárigerleri ota jasap, júktilik kezinde patsıentterdiń ómirin saqtap qalǵan birinshi jaǵdaı emes.
