Jarylǵysh zat qoıylǵan: Ekibastuzdaǵy saýda ortalyǵynan adamdar evakýatsııalandy
PAVLODAR. KAZINFORM - Polıtsııa terrorızm aktisi týraly kórineý jalǵan habarlaý deregi boıynsha qylmystyq is qozǵady.
Quqyq qorǵaý organdaryna Ekibastuzdaǵy «Maxi Moll» saýda – oıyn-saýyq ortalyǵyna jarylǵysh zat qoıylǵany týraly habarlama túsken. Mamandar saýda ortalyǵyndaǵy barlyq adamdy syrtqa shyǵaryp, ǵımaratty tintip shyqty. Nátıjesinde jarylǵysh zat qoıylǵany týraly derek rastalmady.
- Mamandar saýda úıine tekserý júrgizdi. Jarylǵysh qurylǵylar tabylǵan joq. Polıtsııa atalǵan derekke qatysy bar adamdy anyqtaý jáne ustaý boıynsha jedel-izdestirý is-sharalaryn júrgizýde. Oqıǵanyń mán-jaıy men sebepteri tergeý barysynda anyqtalatyn bolady, - dep habarlady Pavlodar oblysy polıtsııa departamentiniń baspasóz qyzmetinen.
Polıtsııa daıyndalyp jatqan terrorızm aktisi týraly kórineý jalǵan habar bergeni úshin QR Qylmystyq kodeksiniń 273-babyna sáıkes 5000 AEK-ke deıingi mólsherde aıyppul salý nemese 5 jylǵa deıingi merzimge bas bostandyǵynan aıyrý jazasy kózdelgenin eske salady.
Eske sala keteıik, osydan bir aı buryn Ekibastuzdaǵy atalǵan saýda úıiniń tóbesi opyrylyp qalǵan edi.