Jarylǵysh zat bar: Atyraýda jalǵan habar kesirinen reıs keıinge qaldyryldy
ASTANA. KAZINFORM – Er adam qol júginde jarylǵysh zat bar dep málimdegen, biraq tekseris nátıjesinde aqparat rastalmady.
Jolaýshylardy evakýatsııalanǵan sát túsirilgen vıdeo jergilikti BAQ-ta jarııalandy. Atalǵan jaıtty kóliktegi oblystyq polıtsııa departamentiniń baspasóz qyzmeti rastady. Oqıǵa 8 qarasha kúni bolǵan.
- Atyraý qalasynyń áýejaıynda «Atyraý - Almaty» baǵyty boıynsha reıske tirkelý kezinde er adam qol júginde jarylǵysh zat bar ekenin aıtyp, jalǵan aqparat taratqan. Atalǵan derek boıynsha kóliktegi polıtsııa departamenti Qylmystyq kodeksiniń 273-baby («Terrorızm aktisi týraly kórineý jalǵan habarlaý») boıynsha qylmystyq is qozǵady. Qylmystyq-protsessýaldyq kodeksiniń 201-babyna sáıkes, sotqa deıingi tergep-tekserý derekteri jarııa etýge jatpaıdy, - delingen resmı túsiniktemede.
Sonymen qatar oqıǵadan zardap shekkender men qaıtys bolǵandar joq ekeni jáne áýejaı jumysy qalypty rejımde jalǵasyp jatqany naqtylandy.
Eske sala ketsek, buǵan deıin Aqtaý–Shymkent reısinde bomba baryn aıtqan áıel psıhonevrologııalyq dıspanserde esepte tur.