«Jaryq jıi sónedi»: Óskemendegi elektr jelileriniń 92,3%-y tozǵan
ÓSKEMEN. KAZINFORM — Óskemen qalasynyń ınjenerlik-kommýnaldyq ınfraqurylymy tozyp tur. Ásirese elektr jelileriniń jaǵdaıy kúrdeli. Olardyń jalpy uzyndyǵy 1 665,3 shaqyrym bolsa, tozý deńgeıi 92,3%-ǵa jetken. Kazinform tilshisi bul maqalada máseleniń mánisine úńilip kórdi.
Jelilerge kimder jaýapty?
Qalanyń ár túkpirinde turatyn halyq sońǵy jyldary jaryqtyń jıi óshetindigine shaǵymdandy. Onyń ishinde jańa úıler kóptep salynyp jatqan Jibek matalar kombınaty yqsham aýdanynyń jurtshylyǵy da óz narazylyqtaryn bildirip jatyr.
— Buryn jaryqtyń sónýi sırek edi. Al endi jıi qaıtalanatyn boldy. Ótken jyly Esenberlın dańǵylynda jaryq shamamen on saǵat boıy óship turdy. Bıyl da toqsyz otyrǵan sátterimiz az bolmady, — deıdi yqsham aýdan turǵyndary.
Óskemen qalasy ákimdiginiń málimetinshe, búginde elektr jelileriniń jalpy uzyndyǵy 1 665,3 shaqyrymdy quraıdy. Ondaǵy tozý deńgeıi — 92,3%.
Elektr jelilerinen bólek jalpy qaladaǵy ınjenerlik-kommýnaldyq ınfraqurylymnyń jaǵdaıy máz emes. Atap aıtqanda, jylý jelileriniń uzyndyǵy 460,7 shaqyrym bolsa, onyń 63,3%-y tozǵan.
Sýmen jabdyqtaý jelileriniń jalpy uzyndyǵy — 1 168,13 shaqyrym, ortasha tozý deńgeıi — 60%. Al sý burý jelileriniń uzyndyǵy — 594,9 shaqyrym.
— Sýmen jabdyqtaý jelileriniń 1 108,43 shaqyrymy «Óskemen Vodokanal» ShJQ KMK-ǵa tıesili, olardyń ortasha tozý deńgeıi 57,5%-dy quraıdy. Al «Taza Óskemen» ShJQ KMK-ǵa qarasty 59,7 shaqyrymnyń tozý deńgeıi — 62,5%. Qalany jylýmen «Óskemen JEO», «Sogra JEO» jáne «Shyǵys Jylý» kásiporyndary qamtamasyz etedi. Sý men káriz júıelerin «Óskemen Vodokanal» jáne «Taza Óskemen» paıdalanady. Elektr jelilerine «Birikken EnergoServıs Kompanııasy» jaýapty, — dep jaýap berdi Óskemen qalalyq TÚKSh, jolaýshy kóligi jáne avtomobıl joldary bólimi basshysynyń orynbasary Rashıd Sherýbaev Kazinform tilshisiniń saýalhatyna.
Bıylǵy jumystar barysy
Ákimdikten jaǵdaıdy jaqsartý úshin qandaı sharalar atqarylyp jatqanyn surap kórdik. Belgili bolǵandaı, 2026 jyly jylýmen jabdyqtaý salasynda jalpy uzyndyǵy 2,3 shaqyrym jylý jelilerine kúrdeli jóndeý júrgizilip jatyr. Onyń 1,7 shaqyrymy nemese 70%-y oryndalǵan. Shlıýznaıa kóshesi, 2/1 mekenjaıyndaǵy 1,4 shaqyrymdyq jylý jelisiniń qurylysy da jalǵasýda, munda jumystardyń shamamen 75%-y aıaqtalǵan. Sondaı-aq Sadovaıa kóshesi boıynsha uzyndyǵy 1,1 shaqyrym jylý jelisin salý kózdelgen. 2026 jylǵy shildede qurylys-montajdaý jumystaryn oryndaýǵa shart jasaldy.
— Sýmen jabdyqtaý boıynsha Metallýrg kentindegi tórt kóshede, atap aıtqanda Vartanıan, Voronın, Entýzıastov jáne Drýjby Narodov kóshelerinde jalpy uzyndyǵy 10,9 shaqyrym jeliler jóndelip jatyr. Jumystardy bıyl aıaqtaý kózdelgen. Al sý burý júıesinde KNS № 17-den shyǵatyn 1,5 shaqyrymdyq qysymdy kollektordy rekonstrýktsııalaý aıaqtalyp, nysan 26 aqpanda paıdalanýǵa berilgen, — deıdi Rashıd Sherýbaev.
Jospar qandaı?
Qaladaǵy jylý ınfraqurylymyn damytý úshin «Óskemen JEO»-da 130 Gkal/saǵ qýatty № 16 qazandyq agregatyn salý, «Shyǵys Jylý» AQ-nyń № 2 qazandyǵyn keńeıtý jáne «Sogra JEO»-da jańa qazandyq agregatyn salý jobalary qolǵa alynbaq. Budan bólek, qýaty 1 000 Gkal/saǵ bolatyn JEO-3 salý kózdelgen. Ony 2030 jyly paıdalanýǵa berý josparlanyp otyr.
— Aldaǵy jyldary Ablaketka, Zaşıta, Prombaza, Jylandy jáne basqa da aýdandardaǵy sý jáne jylý jelilerin damytýǵa basymdyq berilmek. Elektrmen jabdyqtaý boıynsha da jańa aýmaqtardy qosý, qosalqy stantsııalardy rekonstrýktsııalaý jáne baý-baqsha seriktestikteriniń jelilerin damytý josparlanǵan, — deıdi qalalyq TÚKSh, jolaýshy kóligi jáne avtomobıl joldary bólimi basshysynyń orynbasary.
Ákimdik kommýnaldyq jelilerdegi apattardyń aldyn alý úshin tozǵan ýchaskelerdi kezeń-kezeńimen aýystyryp, jelilerdiń tehnıkalyq jaǵdaıyna turaqty monıtorıng júrgiziletinin habarlady. Sonymen qatar elektrmen jabdyqtaý salasynda avtomattandyrylǵan júıelerdi damytý, al sý júıesinde óndiristik protsesterdi avtomattandyrýǵa basa nazar aýdarylmaq.
— Bul jumystardyń negizgi maqsaty — eń tozǵan ýchaskelerdi jańartý, apat sanyn azaıtý jáne qala turǵyndaryn kommýnaldyq qyzmettermen turaqty qamtamasyz etý, — deıdi R. Sherýbaev.
Eske salsaq, buǵan deıin Astanada 10-nan astam kópqabatty turǵyn úı ortalyq jylý júıesine qosylmaǵany habarlanǵan.
