Jarǵanattyń etine jerik bolǵandar Afrıkada ebola bezgegin órshitip otyr
ASTANA. QazAqparat - Batys Afrıkada Ebola bezgegi kúnnen kúnge órship keledi, dep habarlady Lenta.ru.
Búginde Gvıneıa, Serra-Leon jáne Lıberııa elderinde aýrýdyń 60 oshaǵy tirkelken. Vırýsqa qarsy vaktsına joq, sondyqtan dertke shaldyqqan 10 adamnyń biri ǵana aman qalady eken. «Іndetti toqtatý múmkin emes bolyp otyr. Gvıneıa, Serra-Leon jáne Lıberııada aýrýdyń jańa oshaqtarynyń shyǵýy keseldiń ózge aýmaqtarǵa jaıylý qaýpin kúsheıtti», - dedi dáriger Bart ıAnssens. Ebola bezgegi 1976 jyly Zaırda paıda bolyp, birneshe derttiń týýyna sebep bolǵan. Sol kezde Zaırda 280 adam, Sýdanda 151 adam qaza tapqan. Aýrýdy juqtyrǵannan keıin birneshe saǵat nemese 2-3 aptadaı ol baıqalmaýy múmkin. Ádette dertke shaldyqqandardyń dene qyzýy kóterilip (40 gradýstan asady), basy qatty aýyrady. Denesinde bórtpeler paıda bolady. Keıin qusyp, dıareıaǵa ushyraıdy. Keıde ishki qansyraý bastalýy múmkin. 2014 jyldyń aqpanynan Ebola bezgegi qaıta paıda boldy. Ol óte tez tarap ketedi. Gvıneıanyń ońtústiginde paıda bolǵan kesel dereý eldiń astanasyna jetip qaldy. Keıin kórshiles memleketterge de tarap ketti. Іndet saldarynan 337 adam kóz jumdy. Aýrýdy jarǵanattar taratady. Adam oǵan jaqyndaý nemese onyń etin jeý arqyly dertti juqtyrady. Ortalyq Afrıkada ony taǵam retinde paıdalanady. Qazir Gvıneıanyń densaýlyq saqtaý mınıstrligi jarǵanattyń etin paıdalanýǵa tyıym saldy. Іndetti maımyldar da taratýy múmkin. Sondaı-aq ol adamnan ekinshi adamǵa juǵýy múmkin. Ol óli janýarlardan da juǵady eken. 40 jyldyń ishinde ǵalymdar Ebola bezgegine qarsy turatyn esh dári oılap tappaǵan.
