Járdemaqyny aýdarý: Kómekke muqtaj adamdardy HQKO-da tirkeýge turǵyzý usynyldy
«Qazirgi kezde elimizde áleýmettik qamqorlyqqa muqtaj jandar memleketten tıisti áleýmettik kómek túrlerin alyp otyrǵany belgili.
Alaıda, bul tusta qıyndyqtar týǵyzyp otyrǵan máseleler de bar.
«Áleýmettik-eńbek salasyndaǵy kórsetiletin memlekettik qyzmet standarttaryna» sáıkes, keıbir kómekter men járdemaqylardy alý úshin azamattardan turǵylyqty jeri boıynsha tirkelgeni týraly qujat talap etiledi. Mysaly, ataýly áleýmettik kómek alý úshin bir jerde tirkeýde 6 aı turý kerek. Áleýmettik kómekke muqtaj jandar negizinen jaǵdaıy tómen otbasy músheleri ekeni belgili. Olardyń kóbisiniń basynda úıi joq, sáıkesinshe belgili bir jerde uzaq merzimde tirkeýge turýǵa múmkindigi bolmaıdy», - dedi Á. Ábsemetova Úkimet basshysynyń orynbasary Eraly Toǵjanovtyń atyna joldaǵan depýtattyq saýalynda.
Osy oraıda úıi joq bolǵandyqtan, tanystaryna, týystaryna, tipti bóten adamdarǵa júginip, aı saıyn aqsha tólep tirkelýge májbúr bolady.
«Olar óz úıi bolmaǵandyqtan, turǵylyqty jerin de jıi aýystyrady. Al, túrli sebeptermen olar tirkeýden shyǵyp, basqa mekenjaı boıynsha tirkelgennen keıin, olar áleýmettik kómekten 6 aıǵa qaǵylady. Bul jaǵdaı, onsyz da qınalyp otyrǵan kópbalaly analarǵa qosymsha aýyrtpalyq túsirýde. Al endi múgedektigi boıynsha memlekettik áleýmettik járdemaqy taǵaıyndaý úshin azamattarǵa turǵylyqty turatyn jeri boıynsha tirkelgeni týraly talaptar qoıylady. Ýaqytsha tirkeý áleýmettik járdemaqy taǵaıyndaýǵa jaramaıdy. Eger muqtaj jandardyń jeke menshiginde úıi bolmasa, turǵylyqty turatyn jeri joq bolsa, sonda bul azamattar áleýmettik kómekti qalaı alady? Sol sebepti, baspanasy joq kópbalaly analar men múgedek balany tárbıelep otyrǵan azamattar, múgedekter úshin jáne basqa da muqtaj jandar úshin qajettiligi boıynsha áleýmettik kómekti, járdemaqylardy qoljetimdi ári tıimdi etý maqsatynda, olardy Halyqqa qyzmet kórsetý ortalyǵynda turaqty jáne ýaqytsha tirkeýge turǵyzý múmkindikterin qarastyrýdy usynamyz», - dedi depýtat.
«Ekinshi másele, jetim jáne ata-anasynyń qamqorlyǵynsyz qalǵan balalardy baspanamen qamtýǵa qatysty. Qazirgi kúni olarǵa memleket tarapynan kezekke sáıkes turǵyn úı turǵylyqty mekenjaıy boıynsha, ıaǵnı, tek ózi turatyn eldi mekennen beriledi. Al bir aýdanda kóbirek úı berilip jatsa, ekinshisinde tipti múldem berilmeýi múmkin. Óıtkeni, oblystar arasynda jáne bir oblystyń ishindegi aýdandar arasynda respýblıkalyq bıýdjet qarjysy esebinen turǵyn úı salý men berý qarqyny ártúrli», - dedi ol.
Depýtattyń paıymynsha, jetim nemese ata-anasynyń qamqorlyǵynsyz qalǵan balalarǵa oblystyń kez kelgen aýdanynan, bolmasa elimizdiń basqa oblysynan turǵyn úıdi tańdaý múmkindigin berýdi qarastyrý kerek.
«Ekinshiden, balalar úıinen tárbıelenip shyqqan jasóspirimderdiń ańǵaldyǵyn, jaqyny joǵyn paıdalanyp, alaıaqtar olardyń baspanasyn tartyp alǵan jaǵdaılar da kezdesedi. Sol sebepti, jetim jasóspirimderge berilgen turǵyn úı alaıaqtyq jolmen qoldy bolyp ketpesi úshin, olarǵa berilgen sátten bastap 5 jylǵa deıin turǵyn úıdi satýǵa shekteý qoıý qajet dep sanaımyz», - dedi Álııa Ábsemetova.
