Járdemaqy úlkenderge emes, balalarǵa beriledi – Dáýren Abaev

NUR-SULTAN. QazAqparat –QR Aqparat jáne qoǵamdyq damý mınıstri Dáýren Abaev jańa áleýmettik tólemge kóńili tolmaıtyn kópbalaly analar týraly pikir bildirdi, dep habarlaıdy QazAqparat tilshisi.

«Kez kelgen reformaǵa kóńili tolmaıtyndar tabylady. Biraq, bul barlyǵyna unamady degen sóz emes. Sondyqtan, memleket baıaǵy qatelikterin qaıtalady dep aıtýǵa bolmaıdy. Qazirdiń ózinde 400 myń otbasy – 2,5 mln adam járdemaqy alyp úlgerdi. Az qamtylǵan sanatqa jatpaıtyn, biraq 4 bala ósirip otyrǵandarǵa da kómektesý kerek», - dedi mınıstr «Habar» arnasyndaǵy «Ashyq dıalog» baǵdarlamasynda.

Onyń aıtýynsha, barlyq kópbalaly ata-analar aıanbaı jumys istep, kóp nárseden bas tartýǵa májbúr.

«Nesıe alyp, ýaqytynda tóleýge mindettelgender bar. Olar da balalaryn jaqsy kıindirip, qolaıly jaǵdaıda ósirgisi keledi. Nege olarǵa memleket kómektespeýi kerek? Az qamtylǵan azamattarǵa memleket jumys taýyp berýge mindetti, al járdemaqy tabys kóleminen tys barlyq kópbalaly otbasylarǵa beriledi. Kópbalalylarǵa beriletin bul járdemaqy eńbekke jaramdy úlkenderge emes, balalarǵa berilip otyr. Osyny túsiný qajet», - dedi D. Abaev.

Esterińizge sala keteıik, 2020 jylǵy 1 qańtardan bastap 4 jáne odan da kóp kámeletke tolmaǵan balalary bar nemese 23 jasqa deıingi kúndizgi oqý bóliminde oqıtyn stýdentteri bar otbasylarǵa jańa memlekettik járdemaqy beriledi.

Atalǵan memlekettik járdemaqy otbasynyń tabysyna qaramastan saralanǵan mólsherde: 4 balaǵa – 42 496 teńge; 5 balaǵa – 53 127 teńge; 6 balaǵa – 63 757 teńge; 7 jáne odan da kóp balaǵa – 74 388 teńge tólenedi.

Jalpy alǵanda, 2020 jyly kópbalaly otbasylarǵa memlekettik járdemaqy tóleýge 177,6 mlrd teńge kózdelgen. Bul járdemaqyny 346,8 myń otbasy alatyn bolady.