Járdemaqy men zeınetaqyny esepteýde jasandy ıntellekt qoldanyla bastady
ASTANA. KAZINFORM – Qazaqstanda áleýmettik tólemderdi taǵaıyndaý júıesi jańartylyp, endi járdemaqy men zeınetaqyny esepteýde jasandy ıntellekt qoldanylmaq. Bul týraly QR Eńbek jáne halyqty áleýmettik qorǵaý vıtse-mınıstri Bahtııar Jazyqpaev Ortalyq kommýnıkatsııalar qyzmetinde ótken brıfıngide málimdedi.
– Búginde áleýmettik-eńbek salasyndaǵy 49 memlekettik qyzmettiń 45-i elektrondyq formatta kórsetiledi, onyń 28-i proaktıvti túrde usynylady. 2026 jylǵy 1 naýryzdaǵy jaǵdaı boıynsha 1,4 mln qyzmet kórsetildi. Onyń 41%-y elektrondy, 35%-y proaktıvti formatta júzege asyryldy, - dedi ol.
Vıtse-mınıstrdiń aıtýynsha, qyzmet kórsetý júıesi tolyq jańǵyrtylyp jatyr.
– Aldymen qyzmetter elektrondyq formatqa kóshirildi, keıin mobıldi qosymshalarǵa engizildi. Odan soń proaktıvti qyzmet kórsetý men tólemderdi avtomatty túrde taǵaıyndaý iske qosyldy. Endi jasandy ıntellekt qoldaný bastaldy. Bul qyzmet kórsetýdi tolyq avtomattandyryp, azamattarǵa yńǵaıly júıe qalyptastyrýǵa múmkindik beredi, - dedi Bahtııar Jazyqpaev.
Onyń sózinshe, jańa tehnologııalar qazirdiń ózinde birqatar baǵytta qoldanylyp jatyr.
– 2025 jyly ataýly áleýmettik kómekti taǵaıyndaý, jumyssyzdardy tirkeý jáne múgedektikti belgileý osy tásil arqyly júzege asyryldy. Al 2026 jyly zeınetaqy men memlekettik járdemaqylardy taǵaıyndaý, qandas mártebesin berý jáne jumyspen qamtý sharalaryna joldaý kezinde qoldanylady, - dedi ol.
Sonymen qatar vıtse-mınıstr jasandy ıntellekt negizinde qalyptasatyn sheshimder túpkilikti emes ekenin atap ótti.
– Bul sheshimder usynymdyq sıpatta bolady jáne sheshim qabyldaý sapasy men obektıvtiligin arttyrý úshin paıdalanylady, - dep túıindedi ol.
Aıta keteıik, buǵan deıin Eńbek mınıstrligi arnaýly áleýmettik qyzmetterdiń ashyqtyǵyn arttyrý úshin derekqorlardy biriktirý boıynsha pılottyq joba bastaǵan edi.
