Járdemaqy men zeınetaqy qansha teńgege ósti
1 qańtardan bastap Qazaqstanda zeınetaqy men járdemaqylardyń barlyq túriniń mólsheri ósti, dep habarlaıdy Kazinform.
Almaty qalasynyń Azamattarǵa arnalǵan úkimet fılıalynyń elektrondyq is maketterin baqylaý men zańdy jáne jeke tulǵalarmen jumys jónindegi basqarma basshysy Náılá Muhametqalıevanyń sózinshe, qańtardan bastap AEK mólsheri ózgerdi. Qazir ol 3 450 teńgeniń ornyna 3 692 teńge bolady. Osyǵan baılanysty áleýmettik tólemder men aıyppuldardyń mólsheri ulǵaıdy. Qazir eldegi eń tómengi jalaqy mólsheri 85 myń teńge.
Sonymen birge ol 2024 jyly ózgertilgen kórsetkishter boıynsha jańa málimetter keltirdi:
Aılyq eseptik kórsetkish (AEK) – 3 692 teńge mólsherinde;
Eń tómengi zeınetaqy – 57 853 teńge;
Kúnkóris deńgeıi (JM) - 43 407 teńge;
Bazalyq zeınetaqy tóleminiń eń tómengi mólsheri – 28 215 teńge.
Múgedektigi bar azamattar úshin de tólenetin járdemaqy mólsheri de ósti. Múgedektiktiń birinshi toby úshin - 95 486 teńgege deıin, II top úshin - 76 397 teńge, III top úshin - 52 089 teńge.
«7 jasqa deıingi múgedektigi bar balalarǵa tólenetin tólem mólsheri 69 886 teńgeni quraıdy. 7 jastan 18 jasqa deıingi, bala kezinen I toptaǵy múgedektigi bar balalar úshin - 95 496 teńge, II toptaǵy múgedektik - 79 435 teńge, III topta - 69 886 teńge. Qazaqstanda zııandy eńbek jaǵdaılarynda jumys isteıtinder úshin arnaıy tólemder engizildi», - dedi ol.
Sondaı-aq spıker arnaýly áleýmettik tólemder tórt kózden júzege asyrylatynyn atap ótti.
«Respýblıkalyq bıýdjetten eń tómengi kúnkóris deńgeıiniń 2 eselengen mólsherinde; Úkimettiń qaýlysymen bekitilgen tártippen BJZQ-dan qolda bar Zeınetaqy jınaqtaryn eskere otyryp; ómirdi saqtandyrý kompanııalarynan 1 kúnkóris deńgeıi mólsherinde; jumys berýshilerdiń qarajaty esebinen 1 kúnkóris deńgeıi mólsherinde. Budan basqa, qyzmetkerlerge qolda bar Zeınetaqy jınaqtaryn eskere otyryp, mindetti zeınetaqy jarnalary esebinen JZQ-dan tólemder alý quqyǵy beriledi», - dep túsindirdi ol.
