Járdemaqy alý tártibi ózgere me: Úkimet áleýmettik kómekke qatysty jańa júıeni qarady
ASTANA. KAZINFORM — Qazaqstan Respýblıkasynyń Premer-mınıstri Oljas Bektenov Memleket basshysy Qasym-Jomart Toqaevtyń 19 qyrkúıekte «Taza Qazaqstan» respýblıkalyq ekologııalyq aktsııasy kezinde bergen tapsyrmalaryn júzege asyrý máseleleri jóninde keńes ótkizdi. Bul týraly Úkimettiń baspasóz qyzmeti málim etti.
— Memleket basshysy atap ótkendeı, elimiz aýqymdy ózgerister dáýirine qadam basty. Jańa Konstıtýtsııa Ozyq Qazaqstandy odan ári damytýda jańa múmkindikterge jol ashady. Qazirdiń ózinde barlyq salada aýqymdy reformalar júzege asyrylyp jatyr. Jýyrda ǵana Qasym-Jomart Kemeluly Toqaev Úkimet aldyna azamattarǵa áleýmettik kómek kórsetý, joǵary ekologııalyq mádenıet qalyptastyrý, qalalyq jáne respýblıkalyq mańyzy bar joldardyń sapasyn eń joǵary deńgeıde qamtamasyz etý, sondaı-aq Astana qalasynyń Ýrbanıstıka ortalyǵynyń tájirıbesin keńinen taratý máselelerine qatysty birqatar mindet qoıdy, — dep atap ótti Oljas Bektenov.
Premer-mınıstr Prezıdent tapsyrmalaryn tıisti baǵyttar boıynsha oryndaýǵa qatysty mınıstrlikterdiń baıandamalaryn tyńdady.
— Prezıdent atap ótkendeı, memleket áleýmettik mindettemelerin múltiksiz oryndap keledi. Al qajetti áleýmettik kómek tek shyn máninde muqtaj adamdarǵa ǵana kórsetiletinine nazar aýdarý kerek. Mınıstrler men ákimder kórsetilgen barlyq baǵyttar boıynsha aýqymdy jumys júrgizýi tıis. Azamattarǵa kórsetiletin kómektiń túrleri týraly keńinen aqparat berilýi qajet. Óńirlerde ákimdikter áleýmettik járdemaqy alýshylar arasynda túsindirý jumystaryn kúsheıtýi kerek, — dedi Premer-mınıstr.
Buǵan deıin Nurlybek Nálibaev Memleket basshysynyń densaýlyq saqtaý, oqý-aǵartý, týrızm jáne sport salalary jóninde berilgen tapsyrmalaryn oryndaý máseleleri boıynsha keńes ótkizgen bolatyn.
