«Járdem» poıyzy: Aqtóbe oblysynda qant dıabeti men demikpe keń taraǵan
AQTÓBE. QazAqparat - Aqtóbe oblysynda shalǵaıdaǵy 15 stansasynyń turǵyndaryna «Járdem» medıtsınalyq poıyzynyń mamandary tegin medıtsınalyq keńester men alǵashqy medıtsınalyq kómek berdi, dep habarlaıdy QazAqparat.
Qazirgi ýaqytta medıtsınalyq poıyz Atyraý oblysynyń eldi mekenderin aralaýdy bastady, aldaǵy eki aptada ol oblystyń 9 shalǵaı aýylyna toqtaıtyn bolady.
«Járdem» konsýltatıvti-dıagnostıkalyq poıyzynyń mamandary 4 702 turǵyndy, onyń ishinde Aqtóbe oblysynda 847 balany tekserdi. Jalpy, medıtsınalyq tekserý sany - 28 090. 13 shaǵyn hırýrgııalyq ota jasaldy. Hırýrg dárigerdiń tekserýinde 1 543 adam boldy, ýrolog dárigerge 1 868 adam, gınekologqa 1 680 adam qaralǵan.
Emdelýshilerdiń kóp bóligi terapevt dárigerge kelgen – 4 702 adam, nevropatolog - 4 006, oftalmolog – 3 422 adam, LOR-mamany 2 934 naýqasty qabyldady.
Barlyǵy poıyz dárigerleri 2 143 EKG protsedýrasyn, 724 ýltradybystyq zertteý jáne 342 flıýorografııa ótkizdi.
«Biz birqatar aýrýlardy anyqtadyq, olardyń ishinde eń kóp taraǵany - qan qysymy, qant dıabeti, bronh demikpesi. Eresekterdiń arasynda alqym isýi jıi kezdesedi, al balalardyń arasynda temir tapshylyǵy anemııasy, JRVI jáne kúrdeli bronhıt kóp kezdesedi. Mundaı jaǵdaılarda biz patsıentterge ne isteý kerek, kimmen baılanysý týraly keńes beremiz jáne qajet bolǵan jaǵdaıda negizgi terapııa taǵaıyndaımyz»,- deıdi poıyzdyń jalpy tájirıbelik dárigeri Zarına Elmuratova.
Poıyzdyń jumys barysynda dárigerler keıde tótenshe aýyr jaǵdaılarǵa da tap boldy.
«Bizge 1939 jyly týǵan patsıent tekseriske keldi, biz ol kiside gemoglobınniń óte tómen deńgeıin anyqtadyq – norma boıynsha 130-170 bolýdyń ornyna ol kiside 48 boldy. Shuǵyl túrde jedel járdem shaqyrylyp, ol kisi aýyr temir tapshylyǵy anemııasy dıagnozymen aýrýhanaǵa jatqyzyldy», - deıdi «Járdem» medıtsınalyq poıyzynyń bas dárigeri Aınur Eginbaeva.
Medıtsınalyq brıgada quramynda terapevt, pedıatr, gınekolog, xırýrg, LOR, kardıolog, nevropotolog, oftalmolog, ýrolog, onkolog-mammolog jáne stomatolog sekildi barlyq sala dárigeri bar.
Naýqastar medıtsınalyq mamandardan turaqty tekserýden ótý múmkindigi olar úshin óte mańyzdy ekendigin atap ótip, zor rızashylyqtaryn bildirip jatyr.
«Biz balalarymyzben medıtsıanlyq poıyz dárigerlerine tekserýge osymen ekinshi ret qatarynan keldik. Bastapqyda men jalǵyz keldim. Biz stomatolog jáne LOR dárigerdiń qabyldaýynda boldyq, bizge dárigerler bári jaqsy dep aıtty. Dárigerlerge olardyń jumystary úshin alǵys aıtamyz»,- deıdi Shubarqudyq aýylynyń turǵyny Janar Beknazarova.
«Járdem» medıtsınalyq poıyzy «Densaýlyq» medıtsınalyq poıyzymen birge búgingi kúnge deıin respýblıkanyń 50 myńnan astam turǵynyn tekserýden ótkizdi.
Joba «Samuryq-Qazyna» AQ kompanııalar tobynyń atynan «Samruk-Kazyna Trust» Áleýmettik jobalardy damytý qory jáne «QTJ» UK» AQ janyndaǵy Áleýmettik jobalar qorymen birge, sondaı-aq QR Densaýlyq saqtaý mınıstrliginiń at salysýymen júzege asyrylyp jatyr.
