Jaratylystaný baǵytyndaǵy Aýyl olımpıadasynda 200 oqýshy jeńimpaz atandy
ASTANA. KAZINFORM – Astanada aýyl mektepteriniń oqýshylaryna arnalǵan jaratylystaný-matematıkalyq baǵyttaǵy respýblıkalyq olımpıada óz máresine jetti. Qorytyndy kezeńge elimizdiń óńirlerinen 475 oqýshy qatysyp, olardyń 200-i jeńimpaz jáne júldeger atandy.
Marapattaý rásimine qatysqan Qazaqstan Respýblıkasynyń Oqý-aǵartý vıtse-mınıstri Maıra Meldebekova daryndy balalardy qoldaý — memlekettik bilim saıasatynyń basty basymdyqtarynyń biri ekenin atap ótti.
«Memleket basshysy balalardyń zııatkerlik, shyǵarmashylyq áleýetin ashýǵa, daryndy, talantty balalardy qoldaýǵa erekshe nazar aýdarady. Aýyl mektepteriniń oqýshylaryna arnalǵan respýblıkalyq olımpıada — osy maqsattarǵa qol jetkizýdegi mańyzdy quraldyń biri. Intellektýaldyq saıystarǵa qatysý tereń bilimdi ǵana emes, joǵary jaýapkershilikti de talap etedi. Sizder adal ári tartysty básekede óz bilimderińizdi dáleldep, úzdik nátıjelerge qol jetkizdińizder», - dedi vıtse-mınıstr.
Bıylǵy olımpıadada 200 medal sarapqa salyndy: 36 altyn, 66 kúmis jáne 98 qola.
«Olımpıadanyń eń jas qatysýshysy» nomınatsııasy boıynsha dıplommen marapattalǵan — Pavlodar oblysynan 9 synyp boıynsha qatysyp otyrǵan 7-synyp oqýshysy Imran Kýsanov.
«Men 7-synypta oqımyn, biraq olımpıadaǵa 9-synyp boıynsha ekinshi jyl qatysyp otyrmyn. Men halyqaralyq olımpıadalyq rezervtiń bir bóligi bolýdy jáne elim úshin altyn medal jeńip alýdy armandaımyn!», - dedi Imran.
Komandalyq esep boıynsha Gran-prı Mańǵystaý oblysynyń komandasyna tabystaldy.
«Úzdik olımpıadalyq komanda» nomınatsııasy boıynsha I dárejeli dıplomdy Almaty oblysynyń quramasy, II oryndy Atyraý jáne Aqmola oblystarynyń komandalary, III dárejeli dıplomdy Qyzylorda jáne Batys Qazaqstan oblystarynyń komandalary ıelendi.
Jeńimpazdar elimizdiń jetekshi joǵary oqý oryndarynyń bes rektorlyq grantymen marapattaldy. Onyń ishinde: SDU – 2 grant, Satbayev University – 1 grant, Qaraǵandy tehnıkalyq ýnıversıtetinen – 2 grant. Sonymen qatar, 9-10 synyp oqýshylarynyń arasynan matematıka, fızıka jáne ınformatıka pánderi boıynsha І dárejeli dıplom ıegerlerine Almaty qalasyndaǵy Respýblıkalyq fızıka-matematıka mektebinde 2025–2026 oqý jylyna oqý granttary berildi.
Olımpıadanyń qorytyndy kezeńine qatysqan barlyq fınalıster aldaǵy ıntellektýaldyq jarystarǵa daıyndalý úshin «Daryn» respýblıkalyq syrttaı mektebine qabyldanady. Sondaı-aq I dárejeli dıplom ıegerleri 2026 jylǵy naýryz aıynda ótetin respýblıkalyq olımpıadanyń qorytyndy kezeńine qatysý múmkindigine ıe boldy.
Aýyl olımpıadasyn QR Oqý-aǵartý mınıstrliginiń qoldaýymen «Daryn» RǴPO uıymdastyryp keledi.
Aýyl mektepteri oqýshylaryna arnalǵan respýblıkalyq olımpıada jaratylystaný-matematıkalyq jáne qoǵamdyq-gýmanıtarlyq baǵyttaǵy 13 pán boıynsha tórt kezeńde uıymdastyryldy. 2025-2026 oqý jylynda olımpıadanyń mektep kezeńine 125 myń oqýshy qatysqan. Fınalǵa 1000-ǵa jýyq qatysýshy ótti, olardyń 475-i jaratylystaný-matematıkalyq baǵyt boıynsha synǵa tústi. Qoǵamdyq-gýmanıtarlyq baǵyttaǵy olımpıada 9-14 jeltoqsan kúnderi Astana qalasynda ótedi.
Aıta keteıik, elimizde pedagogterdi attestattaý qaǵıdalary qaıta qaralady.