Jarasbaı Súleımenov: Ulttyń iriligi de, usaqtyǵy da osyndaı syn saǵatta kórinedi
ASTANA. KAZINFORM – Belgili jýrnalıst, Qazaqstan Jýrnalıster odaǵy syılyǵynyń laýreaty, Parlament Májilisiniń eks-depýtaty Jarasbaı Súleımenov elimizdegi sý tasqynyna baılanysty Facebook áleýmettik jelisindegi paraqshasynda pikir bildirdi.
«Mine, birneshe kún boldy, joldasym ekeýmiz óz qolymyzben salǵan baspanamyzǵa jete almaı aǵaıyndardy jaǵalap júrmiz. Biz turatyn Teplıchnyı aýyly da, úıimiz de sýdyń astynda qaldy. Áleýmettik jelidegi dostaryma osyndaı jazba usynamyn degen oıym joq edi. Biraq jelini qarap otyrsam, neshe túrli sózder aıtylyp jatyr. Kinálini izdeýshiler qaptap ketipti. Úlkeni de, kishisi de, áıeli de, eri de bılikti jerden alyp, jerge salyp jatyr. Ózimshe solarǵa basý aıtpaq oımen bir-eki aýyz sóz qaldyryp edim, keıbireýlerdiń meni de biraz jerge aparyp tastaǵysy keletinin baıqadym. Mende bireýdi aqtaıyn bolmasa joǵarydaǵylarǵa jaǵynaıyn degen oı joq. Basqa túsken aýyrtpalyqty el bolyp kótereıik, shydaıyq, osaldyǵymyzdy basqalarǵa sezdirmeıik dedim. Tilde súıek joq eken dep betimen ońdy, soldy bezeı berýge bolmaıdy ǵoı. Tasqynǵa qarsy qandaı jumystar atqarylǵanyn, osy iske jumyldyrylǵandardyń kúni-túni tize búkpegenin bilemin. Ózim de ishinde júrdim. Biraq esil eńbek zaıa ketti. Tasqyn sý buryn-sońdy bolmaǵan deńgeıge kóterildi, ekpini de adam aıtqysyz boldy. Naǵyz apat! Eshkimdi aıaǵan joq. Shydamaǵanda qaıda baramyz?!», — dep jazdy ol.
Jarasbaı Súleımenov bul rette japondardan úlgi alý kerektigin aıtady.
«Olar jer silkinisinen kelgen zardapty tistenip júrip, birligimen, muqalmas erik-jigerimen jeńdi ǵoı. Ulttyń iriligi de, usaqtyǵy da osyndaı syn saǵatta kórinedi. Іri bolaıyq! Qansha qıyn bolsa da shydaý kerek. Mundaı syn-qaterlerge talaı el tap bolyp jatyr ǵoı. Sabyr saqtaıyq. Eń bastysy elimiz aman bolsyn! Bul oqıǵanyń da qorytyndysy shyǵarylatyn shyǵar. Sonda tıisti jaýapty adamdar «sybaǵasyn» alady dep oılaımyn. Al qazir baıbalam salyp, daýryqqanmen eshteńe ózgermeıdi. Endi qıyndyqtan shyǵýdyń jolyn izdegennen basqa tańdaý joq bizde. Men jalpy qazaqtyń usaqtalyp, bekzat qasıetterinen, ulttyq qundylyqtardan alshaqtap bara jatqanyna qynjylamyn», — dep jazady eks-depýtat.
