Jaramsyz medıtsınalyq kostıýmder: Jandarbek Bekshınge orynbasary jaýap berdi
ALMATY. QazAqparat - Almaty qalasy sanıtarııalyq-epıdemıologııalyq baqylaý departamenti basshysynyń orynbasary Ásel Qalyqova «sapasyz» qorǵanysh quraldaryna qatysty pikir bildirdi, dep habarlaıdy QazAqparat tilshisi.
Ásel Qalyqova Almatynyń bas sanıtar dárigeri Jandarbek Bekshın aıtqan sózder negizssiz dep esepteıdi. Onyń aıtýynsha, jeke qorǵanysh quraldaryn Qazaqstan Respýblıkasynyń qoldanystaǵy memlekettik satyp alý zańnamasy sheńberinde júzege asyrylǵan.
Ol munyń birneshe sebebin túsindirdi.
«Birinshiden, Qazaqstanda memlekettik satyp alý birneshe jyldan beri elektrondy portal arqyly júzege asyrylyp keledi, sondyqtan tikeleı qoltańbasy men móri bar eshqandaı qujat bolýy múmkin emes. Ekinshiden, jeke qorǵanysh quraldaryna qatysty memlekettik satyp alý qoldanystaǵy zańnama aıasynda ótti. Sonymen qatar, jetkizýshiler jetkizgen taýarlardy qabyldaýǵa men qatysqan joqpyn, ol úshin fýnktsıonaldyq mindetterine kiretin laýazymdy tulǵalar anyqtaldy. Odan bólek, taýardy jetkizý kezinde ónim berýshiler osy saladaǵy monopolıst bolyp tabylatyn «Dárilik zattar men medıtsınalyq maqsattaǵy buıymdardy saraptaý ulttyq ortalyǵy» ShJQ RMK bergen sapa sáıkestiginiń sertıfıkattary men tirkeý kýálikterin berdi, bul «QAZEKSPOAÝDIT» JShS nemese ózge de zerthanalardyń medıtsınalyq maqsattaǵy buıymdarǵa jatatyn jeke qorǵanysh quralǵa saraptama júrgizýge quqyǵy joq degendi bildiredi», - dedi Ásel Qalyqova.
Sondaı-aq, ol memlekettik satyp alýdy jeńip alǵan jetkizýshilermen kelissózderdi Jandarbek Bekshınniń ózi júrgizgenin jáne ózi jeke qorǵanysh quraldary jınaǵynyń birneshe túrinen Almaty qalasynyń sanıtarlyq-epıdemıologııalyq baqylaý departamentine qoıylǵan jıyntyqty ózi tańdaǵanyn aıtty.
«Odan bólek, qurylys normasyna sáıkes 1.03-05-2011 «Qurylystaǵy eńbekti qorǵaý jáne qaýipsizdik tehnıkasy», «Jeke qorǵanysh qurylys quraldary» degen joq. Tek «arnaıy kıim» túsinigi bar. Sondaı-aq, Jandarbek Bekshın siltep otyrǵan «QAZEKSPOAÝDIT» JShS mamanynyń qorytyndysy Almaty qalasynyń sanıtarlyq-epıdemıologııalyq baqylaý departamentine qoıylǵan sapasyzdyq dereginiń negizi nemese rastaýy bola almaıdy, sebebi bul qorytyndyda medıtsınalyq maqsattaǵy buıymdarǵa qatysty jeke qorǵanysh quraly qoldanylmaıtyn normatıvtik-quqyqtyq aktiler qoldanylǵan. «QAZEKSPOAÝDIT» JShS shyǵý kózi belgisiz jeke qorǵanysh quralyna qatysty zertteýler júrgizgenine erekshe nazar aýdarǵym keledi, ótinish berýshi Almaty qalasynyń sanıtarlyq-epıdemıologııalyq baqylaý departamenti satyp alǵan JQQ-nyń eshqandaı qatysy joq hımııalyq áserlerden tergeý ızolıatorlaryna saraptama júrgizýdi suraǵan jeke tulǵa boldy», - dedi Ásel Qalyqova.
Epıdemıolog bul fakt boıynsha bas sanıtarlyq dárigerdiń sotqa júgingenin jáne zańdy kúshine engen sot sheshimderimen Bekshınniń talaptaryn qanaǵattandyrýdan tolyq bas tartylǵanyn atap ótti.
Buǵan deıin, Almatyda 90 mln teńgege satyp alynǵan jeke qorǵanys quraldarynyń qoımada jatqanyn jazǵan bolatynbyz.
Sybaılas jemqorlyqqa qarsy qyzmet janyndaǵy arnaıy monıtorıng toby Almatynyń bas sanıtar dárigeri Jandarbek Bekshınniń ótinishi boıynsha qoımada bir jylǵa jýyq saqtalǵan jeke qorǵanys quraldaryn tekserdi.
