Jaramsyz gaz ballondarynan týyndaıtyn jarylystar sany 100-den asady
ASTANA. KAZINFORM – 1 shildeden bastap elimizde turmystyq gaz ballondaryna suıytylǵan munaı gazyn tańbalaý jáne qadaǵalaý boıynsha pılottyq joba iske qosyldy, dep habarlaıdy QR Energetıka mınıstrligi.
«Tıisti buıryqqa Energetıka mınıstri Erlan Aqkenjenov qol qoıdy. Joba 31 jeltoqsanǵa deıin jalǵasady», – delingen mınıstrlik taratqan aqparatta.
Energetıka mınıstrligi men Tótenshe jaǵdaılar mınıstrliginiń málimetinshe, búginde Qazaqstanda 800 myńnan astam turmystyq gaz ballony aınalymda júr.
«Jyl saıyn jaramsyz nemese paıdalaný merzimi ótken ballondardy qoldaný saldarynan 100-den astam jarylys faktisi tirkeledi», – dedi vedomstvo ókilderi.
Pılottyq joba aıasynda tańbalaý kodtaryn engizý ádisteri, qoldanystaǵy bıznes-protsestermen ıntegratsııa, sondaı-aq aınalymǵa qatysýshylardyń operatsııalyq qyzmetindegi yqtımal ózgerister synaqtan ótedi.
«Pılottyq jobany Energetıka mınıstrligi Tótenshe jaǵdaılar mınıstrligi jáne taýarlardy tańbalaý men qadaǵalaýdyń Biryńǵaı operatory – Tañba kompanııasymen birlesip júzege asyrady», – dedi mınıstrlik.
Mınıstrliktiń habarlaýynsha, gaz ballondaryn tsıfrlyq tańbalaý júıeli esepke alý, qaýipsizdikti qamtamasyz etý jáne barlyq kezeńderde qadaǵalaýǵa múmkindik beredi.
«Pılottyq joba nátıjeleri boıynsha turmystyq gaz ballondaryna mindetti tańbalaý engizý týraly sheshim qabyldanady», – dep málim etti vedomstvo.
Aıta keteıik, qazirgi tańda mindetti tańbalaý úsh taýar tobyna – temeki ónimderi, aıaq kıim jáne dárilik zattarǵa engizilgen.
Sonymen qatar motor maılary, syra jáne syra sýsyndary, zergerlik buıymdar, jeńil ónerkásip taýarlaryn tańbalaý boıynsha pılottyq jobalar aıaqtaldy. BAD ónimderi boıynsha joba iske asyrylýda, al turmystyq hımııa taýarlaryna qatysty pılottyq kezeńdi bastaý josparlanyp otyr.
Aıta keteıik, Pavlodarlyq qutqarýshylar janyp jatqan úıden gaz balonyn alyp shyqty.