Jaraqatynan aıyqqan Ábilhan Amanqul rıngke qaıta oraldy

NUR-SULTAN. QazAqparat - Bokstan Azııa oıyndary men álem chempıonatynyń kúmis júldegeri Ábilhan Amanqul birneshe aıǵa sozylǵan úzilisten soń sharshy alańǵa qaıta oraldy. 75 kelide synǵa túsetin ol kelesi aıdan bastap halyqaralyq týrnırlerge qatyspaqshy, dep jazady Olympic.kz.

"Byltyrǵy Qazaqstan birinshiliginiń fınalynda ıyǵym shyǵyp ketken bolatyn. Sol jaraqattyń saldarynan biraz ýaqyt bokstan alshaqtap qaldym. Emdelýge shamamen tórt aı ýaqyt ketti. Allaǵa shúkir, búginde babymdamyn dep aıtsam bolady. Jeke bapkerimmen birge jattyǵý jumystaryn bastadym. 22 mamyrdan bastap ulttyq qurama qatarynda jattyǵý jıyndaryna qatysamyn. Al kelesi aıda bizdi birneshe halyqaralyq týrnırler kútip tur", - deıdi Ábilhan.

Jaqynda Taılandta ótken Azııa chempıonatynda 75 keli salmaqta Tursynbaı Qulahmet top jardy. Osydan soń, jankúıer qaýym dereý úzdikterdi salystyra bastady. Ábilhannyń óz salmaǵyndaǵy básekelestikke qatysty aıtary joq emes.

"Azııa chempıonatynda Tursynbaı óte jaqsy óner kórsetti. Oǵan tileýles boldym. Ázirge ekeýmiz jolyqqan emespiz. Biraq kim jeńse de, qazaqtyń týy bıikten túspese boldy. Olımpıada oıyndaryna kim attanaryn ýaqyt kórsetedi. Meniń ustanymym bireý - kim barsa da, kók baıraǵymyzdy jelbiretip qaıtsyn. Bizdiń salmaqta básekelestik óte joǵary. Básekelestik joǵary bolǵanda ǵana jaqsy nátıjege qol jetkizemiz", - deıdi boksshy.