Jaraqatynan aıyqqan Ábilhan Amanqul: Olımpıada joldamasyna talasamyn

NUR-SULTAN. QazAqparat - Bokstan álem chempıonaty men Azııa oıyndarynyń kúmis júldegeri, 75 kelidegi komanda úzdigi Ábilhan Amanqul birneshe aı boıy jaraqatyna baılanysty jarystardan syrt qalǵan edi. Ol búginde qatarǵa oralyp, jattyǵý jıyndaryna qatysyp júr, dep habarlaıdy Olympic.kz.

Esterińizge sala keteıik, Ábilhan Amanqul byltyr Aqtaýda ótken Qazaqstan birinshiliginiń aqtyq synynda ıyǵyn aýyr jaraqattap alǵan bolatyn. Sodan beri sportshy Germanııada ota jasatyp, Avstrııada em aldy.

«Jaraqatym, shúkir, jazylyp keledi. Jattyǵý jıyndaryn qaıta bastap, ulttyq quramaǵa oraldym. Iyǵyma Mıýnhen qalasynda ota jasatyp, keıin Avstrııada biraz em aldym. Ulttyq Olımpıada komıteti bilikti mamandardyń qolyna tapsyrǵan soń, bári oıdaǵydaı ótti. Búginde komandalastarymmen birge AІVA-daǵy sporttyq bazada oqý-jattyǵý jıyndaryn ótkizýdemin. Aldaǵy Azııa chempıonatyna qatysa almaımyn. Jaraqatymnyń tolyǵymen jazalyp ketkenin kútý qajet. Eger bári oıdaǵydaı bolyp jatsa, álem chempıonatyna qatysyp, Olımpıada oıyndaryna lıtsenzııa alsam degen maqsatym bar», - deıdi Ábilhan.

Talantty boksshy óz salmaq dárejesinde úzdik sportshylardyń kóp ekenin de jasyrǵan joq.

«Alǵashqy jattyǵý jıyny AІVA-da ótti. Sol kezde qolymdy ıkemge keltire bastadym. Al qazir aqyryndap babyma enip kelemin. Daıyndyq óte joǵary deńgeıde ótýde. Meniń salmaǵymda úzdik boksshylar óte kóp. Ásirese, Tursynbaı Qulahmetti erekshe atap ótkim keledi. Azııa chempıonatynda bizdiń sportshylarǵa Taıland, Ózbekstan eliniń ókilderi qarsylas atanary sózsiz», - deıdi Amanqul Ábilhan.