Jaraqatym el aıtqandaı asa qaýipti deńgeıde emes – Ábıba Ábýjaqynova
ASTANA. KAZINFORM – Barǵan jarysynan júldesiz qaıtpaıtyn qazaqtyń qaısar qyzy Ábıba Ábýjaqynova osydan týra bir apta buryn Ázerbaıjan astanasy Bakýde dzıýdodan Grand Slam týrnırinde taǵy da el qorjynyna júlde syılaǵan bolatyn. Alaıda, kesheli-beri keıbir BAQ ókilderi men áleýmettik jelilerde «Ábıbanyń byltyr alǵan jaraqaty áli jazylmaǵan. Oǵan, tipti, operatsııa jasaý kerek eken» degen áńgimeler jeldeı esip ketti. Osyǵan oraı KAZINFORM tilshisi sportshynyń ózine arnaıy qońyraý shalyp, istiń anyq-qanyǵyn bildi.
- Ábıba, sizdi Bakýde ótken týrnırdegi jeńisińizben quttyqtaımyz!
- Rahmet. Alaıda, ol bir keremetteı jetistik emes. Negizi altyn alýym kerek edi. Bakýdegi jetistigime de, Portýgalııadaǵy jetistigime de ózimniń kóńilim tolǵan joq. Sol jarystarda qatelikterge boı aldyrdym. Artynan kúresterimdi qaıta qarap, analız jasap, qaı jerden qandaı olqylyqtarǵa boı aldyrǵanymdy zerttep, sol qateliktermen jumys istep jatyrmyn.
- Endi Tashkentte altynǵa talasýǵa múmkindik bar ma?
- Árıne. Buıyrsa, altynǵa talasamyn.
- Keıingi kezde áleýmettik jelilerde, sondaı-aq keıbir ınternet basylymdarynda sizdiń densaýlyǵyńyz týraly kóp aıtylyp ketti. «Ábıbanyń byltyr alǵan jaraqaty áli jazylmaǵan. Oǵan, tipti, operatsııa jasaý kerek eken» degen áńgimeler jeldeı esip júr. Siz bul aqparatty qanshalyqty rastaısyz?
- Men jarysqa múlde jaramaı qalǵan joqpyn. Ótkende bir jýrnalıske bergen suhbatymda azdap ıyǵym aýyratynyn aıtqanym ras. Biraq, ol meniń sózderimdi burmalap, «Ábıbaǵa ıyǵyna operatsııa jasatý kerek» dep jazyp jiberipti. Eger, meniń ıyǵym sol jýrnalıst aıtqandaı asa qıyn deńgeıde bolsa, onda jarystarǵa qatysýdan bas tartar edim ǵoı. Mende ǵana emes, sportpen kásibı túrde aınalysyp júrgen barlyq áriptesimde kishigirim jaraqattar bar. Ondaı kezde tańyp ne býyp alyp, jarysqa shyǵamyz, kúresemiz. Qazir meniń ıyǵymdaǵy jaraqatym 20 paıyz emdelýdi qajet etedi. 80 paıyz kúresýge daıynmyn.
- Dzıýdoshylardyń densaýlyǵyn qadaǵalaýǵa ár jarysqa dárigerler birge bara ma?
- Osyǵan deıingi jarystarda bizben birge jarystarǵa dárigerler barmady. Osy joly Tashkentte ótetin týrnırge bizben birge ilesip keldi.
- Parıj Olımpıadasy aldynda sportshylarǵa barlyq jaǵdaıdy jasaýdy maqsat etip, arnaıy «daıyndyq shtaby» qurylǵan edi. Shtap sizderge Olımpıadaǵa alańsyz jattyǵýǵa qandaı múmkindikter jasap jatyr?
- Ázirge óz basym daıyndyq shtabynyń aıyryqsha qamqorlyǵyn sezine qoıǵan joqpyn. Jalpy quramadaǵy qyzdarmen birge ortaq oqý-jattyǵý jıyndaryn ótkizýdemiz.
- Áńgimeńizge rahmet!
