Jaraqat bolǵandyqtan, jekpe-jekti birden aıaqtaý kerek boldy - Qanat Islam
ASTANA. QazAqparat - WBO Intercontinental jáne WBA Fedelatin tujyrymdary boıynsha Álem chempıony, birinshi orta salmaqtaǵy Qanat Islam (22-0-0, 19 KO) brazılııalyq Robson Assıspen bolǵan jekpe-jekke qatysty oıymen bólisti, dep xabarlaıdy QazAqparat.
«Qurmetti Qazaq eli, qazaqstandyqtar! Sizderge alǵysym sheksiz. Eki telearnadan meniń jekpe-jegimdi kórsetti, soǵan qýanyshtymyn! Bul jekpe-jek, ózderińiz kórdińizder, birinshi raýndta aıaqtaldy. Óıtkeni birinshi raýndta jaraqat bolǵannan keıin, maǵan birden bul jarysty aıaqtaý kerek boldy, sebebi ekinshi raýndta judyryqtasýdy toqtatyp jiberý de múmkin edi. Sondyqtan birinshi raýndta barymdy salyp, aıaqtatýǵa tyrystyq. Barlyǵy bizdiń komandanyń josparlaǵanyndaı boldy», - dedi ol Robson Assıspen ótken jekpe-jekten soń bergen suxbatynda.
Aıta keteıik, búgin Ýılmıngton qalasynda (AQSh, Delaver shtaty) WBO Intercontinental jáne WBA Fedelatin tujyrymdary boıynsha Álem chempıony, birinshi orta salmaqtaǵy Qanat Islam (22-0-0, 19 KO) men brazılııalyq Robson Assıs (17-4-0, 9 KO) arasynda kezdesý ótti. Birinshi raýndtyń basynda Qanat Islam qabaǵyn jaryp aldy. Degenmen abyroı bolǵanda, Qanat qarsylasyn ekinshi raýndtan asyrmaı, birinshi raýndtyń sońynda sulatyp saldy.
Boksshylardyń kezdesýi kishi Roı-Djonstyń boks keshiniń aıasynda ótken bolatyn. Bul álemge «Qazaq» degen atpen tanylǵan Qanat Islamnyń kásipqoı rıngtegi 23-shi kezdesýi.
Qanat osyǵan deıin 22 kezdesýinde jeńiske jetip, onyń 18-in nokaýtpen aıaqtaǵan.
