«Jar-Jarda» taǵy da toı!
ASTANA. 15 maýsym. QazAqparat. «Jetinshi arnanyń» «Jar-Jar» jobasy óz atyn tolyǵymen aqtaýda. Baǵdarlamanyń efırdegi bes aıynda tórt úılený toıy toılandy: Jobanyń baspasóz qyzmetiniń habarlaýynsha, mundaı kórsetkishke kez-kelgen "jeńgetaı" jete almaıdy.
Álibek pen Aınur baǵdarlama túsiriliminde tanysyp, ekeýiniń bir-biri úshin jaralǵandaryn birden ańǵardy. Symbatty Aınur arýymyz bolashaq jary Álibektiń júregin jaýlap qana qoımaı, jas jigitti qoldaý úshin baǵdarlamaǵa erip kelgen Álibektiń anasynyń kóńilinen de shyǵa bildi. «Álibektiń anasynyń sózin tyńdaǵanyna, osy baǵdarlamaǵa anasymen kelgenine rıza boldym. Aınur óte tárbıeli, ashyq minezdi qyz»- dep óz oımen bólisti baǵdarlama júrgizýshisi Danagúl Temirsultanova. Álibektiń aıtýy boıynsha, Aınur bir kórgennen onyń kóńilinen shyqqan, baǵdarlama sońynda «kúıeý jigittiń» kóńilinen shyqqan «qalyńdyqqa» usynatyn gúl shoǵyn Aınurǵa usynatynyn alǵashqy sátten aq bilgen. Baǵdarlamadan keıin jastar bir-birimen kezdesip júrdi, alaıda Álibek ata saltyna saı Aınurdy alyp qashýdy jón sanaǵan, nátıjesinde aǵymdaǵy jyldyń 4 maýsymynda jastar úılený toılaryn atap ótti.
«Jar-Jar» baǵdarlamasynyń telearnalardaǵy «telejeńgetaı» qataryndaǵy shoýlardan ereksheligi, onyń zamanaýı qoǵamda umytylyp bara jatqan salt-dástúrlerge qurmet jaıynda baıandaýynda. Sondyqtan da alǵashqy jetistik- baǵdarlama arqyly qosylǵan alǵashqy juptyń toılary qazaqtyń barlyq salt-dástúrlerin saqtaı otyryp toılanyp, baǵdarlama avtorlary úshin orasan zor meıramǵa ulasty. Tazabek Sámbetbaı men Kámshat Jaqsylyqqyzynyń úılený toılary Naýryz meıramy qarsańynda toılanyp, osy toıǵa shaqyrylǵan kóp qonaqpen qatar basty syıly qonaq retinde jastar ómirinde eleýli oryn alǵan «Jar-Jar» televızııalyq jobasynyń uıymdastyrýshylary da shaqyryldy. Baǵdarlama júrgizýshisi Danagúl Temirsultanova: «Osylaısha bizdiń baǵdarlama arqyly bir-birin taýyp jatqan juptardy kórgen saıyn ózim jar tapqandaı qýanyshqa bólenemin. Baǵdarlamamyzdyń berik, ári uzaq merzimdi qarym-qatynas qurýǵa kómektesetindigine senimdimin. Jas jubaılarǵa uzaq, ári baqytty ǵumyr tileımin, al ómir serigin tappaǵandarǵa «Jar-Jar» baǵdarlamasyna qosh kelińizder demekpiz»- dep aǵynan jaryldy.
«Jar-Jar» baǵdarlamasynyń «Úılený toı marafony» jalǵasýda: baǵdarlamanyń túsirilim alańynda «shyraqtalǵan» kelesi úılený toıy aǵymdaǵy jyldyń shilde aıynda atap ótilmek. «Jetinshi arna» bul jetistiktermen shektelmeýge bel býdy: 1 shildeden bastap arnanyń resmı saıtyna «Jar-Jar» baǵdarlamasy arqyly juptasqan jas jubaılardyń foto sýretteri ornalastyrylady. Kórermen ózine unaǵan jupqa daýys bere alady, al jeńimpaz jupqa «otbasylyq baqytqa» qosymsha syılyq retinde álemniń úzdik shıpajaıynyń birine joldama usynylady. Daýys berý 1- shilde men 24- shilde aralyǵynda júrgiziledi, 25- shildede daýys berý qorytyndysy jarııalanady, al tamyz aıynda baqytty jubaılar otbasylyq ómirlerindegi alǵashqy saıahatqa attanady.
