«Jar-jar» aıtatyndar kóbeıdi: Jazda qansha jup otaý qurǵany belgili boldy
ASTANA. KAZINFORM — Qazaqstanda jyl basynan beri 74 myńnan astam neke tirkeldi. Ásirese jaz aılarynda qazaqstandyqtar belsendi túrde shańyraq kótergen.
Qazaqstanda jyl saıyn qyrkúıek aıynyń ekinshi jeksenbisinde Otbasy kúni atalyp ótedi. Osy aıtýly mereke qarsańynda «Azamattarǵa arnalǵan úkimet» memlekettik korporatsııasy elimizdegi neke qııý statıstıkasyn jarııalady.
2026 jyldyń qańtar-tamyz aılarynda Qazaqstanda 74 648 neke resmı túrde tirkeldi. Ásirese jaz aılarynda shańyraq kótergen juptardyń sany kóp. Jazdyń úsh aıynda 38 myńnan astam jup nekesin resmı túrde qıdy.
— Jazdyń eń kóp neke qıylǵan aıy — maýsym. Osy aıda 15 myńnan astam neke tirkeldi. Al tamyz aıynda 11 761, shildede 11 674 jup otbasyn quryp, ómirleriniń jańa kezeńine qadam basty, — delingen habarlamada.
Jańa otbasylar sany boıynsha Almaty qalasy kósh bastap tur — munda 12 344 neke tirkelgen. Odan keıin Astana qalasynda — 9 074, Túrkistan oblysynda — 5 611 neke tirkelgen.
Neke qııý týraly ótinishti tirkeýshi organ arqyly, elektrondyq úkimet portaly arqyly nemese ekinshi deńgeıdegi bankterdiń mobıldi qosymshalary arqyly berýge bolady.
Osyǵan deıin Ádilet mınıstrligi qazaqstandyqtarǵa eskertý jasap, «nekeni uzartý» týraly habarlama kelse, siltemege ótpeýge shaqyrdy.
