Jappaı jol apatynan kólikti qalaı saqtandyrǵan durys — agenttik keńesi

ASTANA. KAZINFORM — Qarjy naryǵyn retteý jáne damytý agenttigi jappaı jol apatynan kólikti qorǵaýdyń joldaryn túsindirdi.

— Mindetti saqtandyrý jol apatynyń saldarynan úshinshi tulǵalardyń ómirine, densaýlyǵyna jáne múlkine keltirilgen zııandy óteýge arnalǵan. Al apatqa kináli dep tanylǵan adamnyń kóligine keltirilgen zııandy óteýge qatysty qoldanylmaıdy. Erikti avtosaqtandyrý (KASKO) apatqa kináli adamnyń da saqtandyrylǵan kóligi zaqymdansa, joǵalsa nemese tolyq joıylsa, zalalyn óteýdi kózdeıdi. Bul rette saqtandyrý óteminiń sharttary men tártibi ár túrli saqtandyrý táýekelderin, franshıza mólsherin, shyǵyndardy retteý tártibin, jóndeý formatyn jáne júrgizýshi kinásiniń dárejesin eskere otyryp, qosymsha servıstik qyzmetterdi qamtýy múmkin, — dep jazady agenttik mamandary.

Agenttik málimeti boıynsha, qazir elimizde 15 kompanııanyń erikti avtosaqtandyrý lıtsenzııasy bar. 2025 jyldyń 11 aıynda bul kompanııalar 77,3 mlrd teńgege erikti avtosaqtandyrý kelisimshartyn jasap, jol apatyna ushyraǵan kólik ıelerine shyǵyndy óteý úshin 26,5 mlrd teńge tólegen.

Aıta ketý kerek, kólikti erikti saqtandyrý quny mindetti saqtandyrýdan birneshe ese joǵary, saqtandyrý paketi men kóliktiń markasyna baılanysty ózgeredi. Al mindetti saqtandyrý polısiniń ortasha quny shamamen 15 myń teńge.

Buǵan deıin Májiliste avtosaqtandyrý kompanııalary tóleıtin ótemaqy kólemin arttyrýǵa arnalǵan bastama talqylanyp jatqanyn jazǵan edik.