Jappaı jol apatyna ushyraǵan kólik ıelerine qandaı ótemaqy beriledi
ASTANA. KAZINFORM — Jappaı kólik apatyna ushyraǵan kólik ıeleri qandaı ótemaqy ala alady. Bul suraqqa «Evrazııa» saqtandyrý kompanııasynyń baspasóz qyzmeti jaýap berdi.
— Jappaı jol-kólik oqıǵasynan zardap shekken júrgizýshiler saqtandyrý tólemin kasko erikti keshendi saqtandyrý sharty boıynsha nemese avtokólikti mindetti saqtandyrý sheńberinde ala alady. Búginge deıin iri kólik apatynan zardap shekken úsh kólik ıesi «Evrazııa» saqtandyrý kompanııasyna keshendi saqtandyrý baǵdarlamasy boıynsha tólem alý úshin júgindi. Kasko saqtandyrý baǵdarlamasy aıasynda zaqymdanǵan kólik quralynyń júrgizýshisi jol-kólik oqıǵasyna kináli nemese kinásiz ekenine qaramastan, tipti keıinnen kináli tulǵa anyqtalmaǵan jaǵdaıda da saqtandyrý tólemin ala alady, — deıdi kompanııanyń baspasóz qyzmeti.
Alaıda mindetti saqtandyrý arqyly ótemaqy alatyn adamdar myna jaıdy eskerýi kerek bolady.
— Kólik quralyn mindetti saqtandyrý sheńberinde kináliniń saqtandyrý kompanııasy jábirlenýshige zańda belgilengen shekti mólsher — 2 myń AEK nemese 7,864 mln teńgege deıin ótemaqy tólep beredi. Bul soma kináli júrgizýshiniń áreketi nátıjesinde zardap shekkenderdiń barlyǵyna bólinedi jáne barlyq shyǵyndy jappaýy múmkin. Jábirlenýshiler qalǵan somany kináli azamattan sot arqyly óndire alady. Atap óterlik jaıt, jábirlenýshiler sany jáne suralatyn qarjy kóp bolǵan jaǵdaıda jeke tulǵadan tolyq somany óndirip alýy ekitalaı. Polıtsııa barlyq mán-jaıdy jáne jappaı kólik apatyna sebepker bolǵan júrgizýshini anyqtaýy kerek. Eger kináli anyqtalmasa, keshendi saqtandyrý polısi joq júrgizýshiler kólikti óz qarajatyna jóndetýge májbúr bolady, — delingen habarlamada.
Odan bólek jappaı kólik apatyna jaýaapkershilik joldy kútip ustaýǵa jaýapty mekemege de júkteletin kez bolady.
— Jol qozǵalysy zańnamasyna sáıkes, joldardy kútip ustaýǵa jaýapty uıym qaýipsizdikti qamtamasyz etýge, onyń ishinde kóktaıǵaqqa qarsy sharalardy jasaýǵa mindetti. Eger uıym óz mindetterin oryndamaǵany sebepti jol-kólik oqıǵasy bolǵany anyqtalsa, zardap shekken kólik ıeleri toptyq shaǵym túsirýge quqyly. Alaıda bul jaǵdaıda keshendi saqtandyrý boıynsha saqtandyrý tólemin alý kezindegideı bári jeńil bolmaıdy. Jábirlenýshi sot barysynda kóp ýaqytyn jáne zańger qyzmetine qomaqty qarajat jumsaýy kerek bolady, — delingen saqtandyrý kompanııasynyń túsindirmesinde.
«Evrazııa» SK statıstıkasyna sáıkes, jol-kólik oqıǵalarynyń 90%-ynda eki kólik soqtyǵysqan bolady. Qalǵan 10% jaǵdaıda úsh nemese odan da kóp kólik apatqa ushyraǵany tirkeledi. Al jappaı kólik apaty — sırek kezdesetin jaǵdaı.
Esterińizge sala keteıik, 3 qańtarda Aqmola oblysynda Astana-Şýchınsk tas jolynda 95 kólik jappaı jol apatyna ushyrap, 20 adam medıtsınalyq kómekke júgingen bolatyn.