Jappaı vaktsınatsııa bastalǵanda emhanaǵa aldymen zeınetkerler keldi - ımmýnolog
AQTÓBE. QazAqparat - Immýnolog dáriger Lıaılıa Nurjanova qazirgi kezde vaktsına saldyrýǵa nıettiler sany artqanyn aıtty. Al jappaı vaktsınatsııa bastalǵan kezde aldymen zeınetkerler ımmýndaýǵa qatysqan, dep habarlaıdy QazAqparat tilshisi.
№2 Aqtóbe qalalyq emhanasy boıynsha 11 myńnan astam adam vaktsınanyń birinshi komponentin qabyldady. Al 5 myńǵa jýyǵy eki dozasyn da saldyrdy. Immýnolog dáriger Lıaılıa Nurjanova qazirgi jumysy men adamdarǵa túsindirý sharasynyń mańyzy týraly aıtyp berdi.
«Jalpy, dáriger men quqyq qorǵaý organdarynyń qyzmetkerleri aqpan aıynan bastap vaktsına saldyrdy. Aqtóbege jetkizilgen tórt túrli vaktsına da emhanaǵa berildi. Qazirgi kezde tek Spýtnık V vaktsınasyn berip jatyrmyz. Adam kóp. Kúnine shamamen 250-300 adam keledi. Jumys 9:00-den 20:00-ge deıin jalǵasady. Senbi, jeksenbi kúnderi de jumys toqtamaıdy. Shyn máninde keshkilik jumystan shyǵyp keletinder bar. Ári kóp ujymǵa ımmýndaý jumysyna qatysý mindetteldi»,- dedi №2 Aqtóbe qalalyq emhanasynyń ımmýnolog dárigeri Lıaılıa Nurjanova.
Talap boıynsha ekpe saldyrmas buryn dárigerler tekseredi. Júkti áıel, onkologııalyq aýrýǵa shaldyqqandar men hımııaterapııa alyp júrgender vaktsına saldyrmaıdy.
«Sozylmaly dertke shaldyqqandar qazir ózin jaqsy sezinse, vaktsına saldyra beredi. Týa bitti sal aýrýymen aýyratyndar, ınsýlt alǵandar da ımmýndaý jumysyna qatysa alady. Sóıtip ár adamnyń densaýlyǵyna, jaǵdaıyna jeke qarap, sheshim shyǵaramyz. Adamdar úshin emhanada barlyq jaǵdaı jasalǵan. Birinshi jáne ekinshi komponentti eki bólek kabınette qabyldaıdy. Úsh kún boıy dárigerlerimen baılanysyp, óz jaǵdaıyn aıtyp turady. Orny syzdap, basy aýyrǵandar boldy. Olar tek 2-3 kún ózin jaısyz sezindi. Ózimde de vaktsına saldyrǵan oryn aýyrdy. Aýyryp, aýrýhanaǵa túskenderi kezdespedi. Jasy 80-nen asqan adamdar da kelip, alǵysyn aıtyp ketip jatyr. Shynymdy aıtsam, alǵash kúnnen beri zeınetkerler belsendi. Sodan keıin mektep, kolledj muǵalimderi, oqytýshylary keldi. Adamnyń kep kelýi bizdi qýantady»,- dedi Lıaılıa Nurjanova. Degenmen ár kelýshige zeıin salyp, olardyń júrek soǵysyn, tynys alýyn tyńdaý, qyzýyn ólsheý de biraz ýaqytty talap etedi.
«Men vaktsına saldyrmaımyn» degen adamnyń mamandarmen kezdesýine jaǵdaı jasaldy. Immýnolog, epıdemıologtar jan-jaqty dáleldi sóz aıtqan soń birden onyń pikiri ózgerdi. Bári buǵan deıin áleýmettik jeliden ǵana aqparat alǵan. Sóıtip teris pikir qalyptastyrdy. Al mamandar durys jolyn aıtty«,- dedi Lıaılıa Nurjanova.
