Jappaı tsıfrlandyrý, jasandy ıntellekt Joldaýdyń negizgi arqaýy boldy – Rýslan Jeldibaı
ASTANA. KAZINFORM - Búgin Prezıdent halyqqa arnaǵan Joldaýyn jarııalady. Jappaı tsıfrlandyrý jáne jasandy ıntellekt tehnologııasyn engizý arqyly ekonomıkany jańǵyrtý Joldaýdyń negizgi arqaýy boldy.
Bul týraly Qazaqstan Prezıdentiniń keńesshisi — baspasóz hatshysy Rýslan Jeldibaı óziniń Facebook paraqshasynda jazdy.
- Memleket basshysy Qazaqstan úsh jyl ishinde mindetti túrde tsıfrlyq el bolýy kerek degen mindet qoıdy, - dep jazdy ol.
Osyǵan oraı birneshe mańyzdy bastama kóterdi:
Tsıfrlyq kodeksti tezirek qabyldaý. «Zańda jasandy ıntellekt, platformalyq ekonomıka, úlken derekqorlardy paıdalaný jáne basqa da máseleler aıqyndalýǵa tıis»;
Jasandy ıntellekt jáne tsıfrlyq damý mınıstrligin qurý;
Tsıfrlyq aktıvterdiń tolyqqandy ekojúıesin qalyptastyrý
Tsıfrlyq teńgeniń qoldaný aıasyn odan ári keńeıtý qajet.
Ulttyq banktiń ınvestıtsııalyq korporatsııasy negizinde Tsıfrlyq aktıvterdiń memlekettik qoryn qurǵan jón.
Alatau City qalasyn aımaqtaǵy tolyq tsıfrlanǵan alǵashqy qalaǵa aınaldyrý.
«Munda Smart City tehnologııalaryn qoldanýdan bastap taýarlar men qyzmet aqysyn krıptovalıýtamen tóleýge deıingi jańalyqtyń barlyǵy engizilýi kerek»;
Mektep oqýshylaryna arnalǵan jasandy ıntellekt negizderi týraly baǵdarlama jáne oqý materıaldaryn ázirleý.
Prezıdent tapsyrmasymen qashyqtan oqytý tásili jáne jasandy ıntellekt tehnologııasy negizinde «Qazaq Digital Mektebi» atty shaǵyn jınaqty mektep úlgisi jasalady;
Budan bólek, ol Memleket basshysy JI tehnologııasy men tsıfrlyq quraldardy geologııalyq barlaý, aýyl sharýashylyǵy, keden jáne logıstıka, qurylys, sý resýrstaryn basqarý sekildi birneshe baǵytta keńinen qoldanýdyń mańyzyna toqtalǵanyn jetkizdi.
Memleket basshysy Joldaýda ınvestıtsııalyq ahýaldy jaqsartý, kásipkerlerdi yntalandyrý jáne olardyń quqyǵyn qorǵaý jóninde birqatar mańyzdy usynys aıtty.
Bas prokýratýranyń Zańsyz aktıvterdi qaıtarý jónindegi komıteti Investorlardyń quqyǵyn qorǵaý jónindegi komıtet bolyp ózgeredi.
Jalpy, Bas prokýratýra jumysynyń nátıjesinde qazynaǵa 850 mıllıard teńgege jýyq qarjy qaıtaryldy. Qarjy 10 mektep, 4 sport ǵımaraty, 235 densaýlyq saqtaý nysany men 177 sý ınfraqurylymy nysanynyń qurylysyna jáne jóndeý jumystaryna jumsaldy;
Ulttyq qordyń turaqty damý quraly retinde rólin qaıta qaraý qajet. «Qordy qosymsha ınvestıtsııa kózi retinde qoldaný úshin el ishindegi bolashaǵy zor jáne naryqtaǵy áleýeti joǵary bolatyn jobalarǵa qarjy bólýge bolady»;
Ulttyq bank pen Úkimet bankterdiń aqshasyn ekonomıkaǵa barynsha tartýdyń tıimdi tásilderin tabýy kerek.
Arnaıy ekonomıkalyq aımaqtardy basqarýǵa jeke kompanııalardy, qajet bolsa, shetel kompanııalaryn tartýǵa bolady.
Kásipkerler — elimizdi tsıfrlyq damytýdyń qozǵaýshy kúshi;
Jańa Salyq kodeksi salyq tóleýshilerdiń ashyqtyq pen adaldyqqa negizdelgen jańa tanym-túsinigi men bolmysyn qalyptastyrýǵa tıis;
Salyqtan túsken ár teńge halyqtyń ıgiligine jumsalýǵa tıis. Bul – azamattarǵa sapaly memlekettik qyzmet kórsetilip, ınfraqurylym salynyp, memlekettik qoldaý sharalary usynylýy qajet degen sóz.
Ónerkásip, energetıka salasyndaǵy jetisterdi eseleı túsý qajet:
Sońǵy bes jylda óńdeý ónerkásibinde birqatar jetistik bar.
Óńdeý ónerkásibiniń jalpy qosymsha quny eki ese ósip, 17 trıllıon teńgege jýyqtady. Al onyń jalpy ishki ónimdegi úlesi 12,4 paıyzǵa jetti. Byltyrdyń ózinde 163 jańa óndiris iske qosyldy.
Eń mańyzdy baǵyttar: metallýrgııa, avtokólik óndirisi, gaz-hımııa kesheni t.b.
Ekonomıkany turaqty damytý úshin bir AES jetkiliksiz. Ekinshi, tipti úshinshi atom elektr stantsııasynyń qurylysyn qazirden bastap josparlaı berýimiz kerek;
QHR-men atom salasyndaǵy strategııalyq seriktestik týraly ýaǵdalastyqqa qol jetkizildi;
Geologııa barlaý jumystaryn kúshıtip, jer qoınaýyna qatysty málimettiń bárin, eń aldymen, jasandy ıntellektini engizý arqyly júıelep, tsıfrlandyrý qajet.
Prezıdent joldaýda aýyl sharýashylyǵyn jańa deńgeıde kóterý joldaryna toqtaldy.
Atap aıtqanda Úkimetke jáne Aýyl sharýashylyǵy mınıstrligine:
Úzdik agro holdıngterdiń tájirıbesin jappaı taratý;
Agrohabtar jáne logıstıka ortalyqtaryn damytý;
Mal sharýashylyǵy salasyndaǵy agrobıznesti qoldaý josparyn ázirlep, naqty qarjylandyrý sharalaryn bastaý;
Eldegi azyq-túlik naryǵynyń ımportqa táýeldiligin barynsha azaıtý;
Agrarlyq eksporttyń naqty josparyn ázirleý;
EAEO aıasynda otandyq kásipkerlerdiń múddesin qorǵaý;
Aýyl sharýashylyǵy jerlerin berý tásilderin túbegeıli ózgertý tapsyryldy.
- Budan bólek, Memleket basshysy kólik-logıstıka, turǵyn úı-kommýnaldyq sharýashylyq, qurylys, sý resýrstaryn basqarý, bilim, ǵylym jáne ınnovatsııany damytý sekildi mańyzdy baǵyttardaǵy strategııalyq maqsattardy aıqyndady,-dedi Qazaqstan Prezıdentiniń keńesshisi.
Osyǵan deıin Qazaqstanda jasandy ıntellekt jáne tsıfrlyq damý mınıstrligi qurylatyny týraly jazdyq.