Jappaı tártipsizdikter kezinde alańǵa shyqqandarǵa metall armatýra taratqandar ustaldy

NUR-SULTAN. QazAqparat – Almatyda bolǵan jappaı ereýil kezinde alańǵa shyqqandardyń qoldaryna metall armatýra ustatqan 6 almatylyq turǵyn ustaldy. Bul týraly QR ІІM ákimshilik polıtsııa komıteti basqarma basshysynyń orynbasary Dáýren Qozybaqov málim etti, dep habarlaıdy QazAqparat tilshisi.

«Quqyqtyq tártip» jedel-profılaktıkalyq sharasy barysynda 2 myńnan astam buryn jasalǵan aýyr jáne asa aýyr qylmys ashyldy. Sonymen qatar izdeýde júrgen 327 qylmysker ustaldy. Mysaly, Almaty qalasynda jappaı tártipsizdikterge qatysqan Almaty qalasy men Almaty oblysynyń 6 turǵyny ustaldy. Olar quqyq qorǵaý organdary jáne áskerı qyzmetshilerge qarsy shyǵý úshin ereýilge qatysýshylarǵa metall armatýr taratqan», - dedi Dáýren Qozybaqov onlaın ótken brıfıngte.

Odan bólek, ІІM ókili jedel-profılaktıkalyq shara aıasynda kámelet jasyna tolmaǵan balaǵa shabýyl jasaǵan kúdiktiniń ustalǵanyn aıtty.

«2017 jyly Shymkent qalasynda kóshede atys qarýyn qoldana otyryp, kámeletke tolmaǵan balany óltirýge qatysýshy retinde halyqaralyq izdeýde júrgen kúdikti araǵa birneshe jyl salyp Tarazdan ustaldy», - deıdi ol.

Buǵan deıin mınıstrlik elimizde qylmys jıi bolatyn óńirlerdi ataǵan edi.

Sondaı-aq, brıfıng barysynda qazaqstandyqtardy 60 mln teńgege san soqtyryp ketken alaıaqtyń Dýbaıdan ustalǵany aıtyldy .