Jappaı tártipsizdikten keıingi Almaty kórinisi – fotoreportaj

ALMATY. QazAqparat – Jappaı tártipsizdikten keıin Qazaqstannyń eń iri qalasy orasan zor shyǵynǵa ushyrady. Kóptegen ǵımarat pen saýda oryndary tonalyp, órtendi. Búgingi kúni qalada lańkestikke qarsy arnaıy operatsııa áli jalǵasyp jatyr. Armııa men polıtsııa negizgi nysandardy jaýyp tastady. QazAqparat fototilshisi Almaty kósheleriniń búgingi kórinisin kórsetti.

QazAqparattyń Almatydaǵy fototilshisi qalanyń ortalyq kóshelerin aralap shyqty.

Buzaqylar men lańkesterden eń kóp zardap shekken qalanyń ortalyq alańy qazir qorshaýǵa alynǵan. Munda birneshe áskerı bólimshe kezekshilik etýde. Olar ótip bara jatqan adamdardyń qujattaryn muqııat tekseredi.

Megapolıste birqatar ǵımarat pen dúken tonalyp, órtendi. Atameken» QR Ulttyq kásipkerler palatasy kásipkerlerdi zalaldyń aýqymy men sıpatyn foto jáne vıdeoǵa muqııat túsirýge shaqyrady.

Qalanyń keı jerlerinde turǵyndar balalarymen serýendep júr. Degenmen, kópshiligi áli de úılerinen shyǵýǵa qorqady.

Bankomat, dúkender men naýbaıhanalar aldynda kezek baıqalady.

Іri saýda jelileri, bazar, dárihana men janar-jaǵarmaı quıý stantsııalarynyń jumysy kezeń kezeńimen qalpyna keltirilýde.

9 qańtarda megapolıstiń barlyq aýdandarynda 77 sýpermarket ashyldy. Qalalyq shtab azyq-túlik qory jetkilikti dep sendirdi.

Búginde qalada 70 jelilik jáne 40 iri bólshek dárihana jumys istep tur. «Barys», «Almaty-1», «Arystan» bazarlary da ashyq.

Sonymen qatar, 44 janar-jaǵarmaı quıý beketi ashyldy, taǵy 25-ke jýyq stansa ashýǵa daıyndalýda.

Benzın men dızel otynynyń quny burynǵy deńgeıde saqtaldy, gazdyń lıtri 70 teńgege deıin tómendetildi .

Sondaı-aq, Almatynyń kommýnaldyq qyzmeti qalany tazartý jumystaryna kiristi . Keshe qalada 950 tonna qatty turmystyq qaldyq shyǵaryldy.

Qalada baǵdarsham nysandaryn qalpyna keltirý jumystary bastaldy, aldyn ala málimetter boıynsha jappaı tártipsizdik kezinde 40 baǵdarsham isten shyqqan. Qaıta qalpyna keltirý jumystarynyń smetalyq quny 72 mln teńge.

Qala tirshiligin qamtamasyz etý shtabynyń málimetinshe, Almatydaǵy barlyq bilim berý uıymdary qatań baqylaýda. QR Bilim jáne ǵylym mınıstrligi mektepterdegi qysqy demalystardy 17 qańtarǵa deıin uzartty. Al joǵary oqý oryndary men kolledj stýdentteri 24 qańtarǵa deıin demalady.

Búginen bastap Almatyda qoǵamdyq kólikter 11 baǵyt boıynsha qaıta júre bastady.

Qazirgi ýaqytta Almaty halyqaralyq áýejaıynda qalpyna keltirý jumystary júrgizilýde. Keltirilgen shyǵyn eseptelip jatyr.

Almaty komendatýrasy qala turǵyndaryn saq bolýǵa shaqyrdy.