Jappaı tártipsizdik: Ustalǵandardyń kóbi urlyq pen maroderlik úshin aıyptalyp otyr

NUR-SULTAN. QazAqparat – QR Adam quqyqtary jónindegi ýákil Elvıra Ázimova eldegi tártipsizdikter kezinde ustalǵandardyń kópshiligi urlyq pen maroderlyq úshin aıyptalyp jatqanyn aıtty, dep habarlaıdy QazAqparat.

«Men sóılesken tutqyndardyń arasynda óz derekterin jarııa etýge, jaqyndaryna ustaý faktisi týraly habarlaýǵa qarsylyq tanytqandar da boldy. Olar óz jaqyndaryna zııan keltirgisi kelmeıtinderin jáne uıalatyndaryn aıtty. Barlyq faktiler tekserilip, ádilettilik ornaıdy dep úmittendi. Qazirgi ýaqytta ustalǵandardyń kópshiligi urlyq jasaý men maroderlik úshin aıyptalyp otyrǵanyn atap ótkim keledi.Bul faktilerdi de nazardan tys qaldyrýǵa bolmaıdy. Ustalǵandardyń arasynda qarapaıym turǵyndar bar, olar jasaǵan áreketteri úshin jaýapkershilikti tolyq túsinbegen», - dedi Elvıra Ázimova Ortalyq kommýnıkatsııalar qyzmetinde ótken baspasóz máslıhatynda.

Buǵan deıin spıker óńirlerdegi ýaqytsha ustaý ızolıatorlaryna baryp, qamaýǵa alynǵan azamattarmen suhbattasqanyn aıtqan edi. Birneshe kúnde olar 11 óńirdegi 34 mekemege barǵan.

Sondaı-aq adam quqyqtary jónindegi ýákil tártipsizdik kezinde ustalǵandar qandaı máselelerge jıi shaǵymdanatynyn aıtty.