Jappaı narazylyq sherýi: Portýgalııanyń 30 qalasynda baspana daýy órshidi

ASTANA. KAZINFORM – Portýgalııanyń 30-dan astam qalasynda jyljymaıtyn múlik pen jaldaý aqysynyń qymbattaýyna qarsy jappaı narazylyq aktsııalary ótti. Myńdaǵan turǵyn úkimetten baspananyń qoljetimdiligin qamtamasyz etý sharalaryn qabyldaýdy talap etti, dep habarlaıdy Euronews.

Jappaı narazylyq sherýi: Portýgalııanyń 30 qalasynda baspana daýy órshidi
Foto: eurotopics.net

«Olar bizdiń bul jerde turý quqyǵymyzdy tartyp ala almaıdy» degen uranmen ótken aktsııaǵa qatysýshylar jaldaý aqysyn shekteýdi, áleýmettik turǵyn úı qoryn keńeıtýdi jáne turǵyndardy úıden shyǵarýdan qorǵaýdy kúsheıtýdi talap etti.

Narazylyqqa úkimettiń jańa zań jobasy da sebep boldy. Ol jalǵa alýshylardy úıden shyǵarý merzimin úsh aıdan eki aıǵa deıin qysqartýdy, baǵa shekteýlerin alyp tastaýdy jáne bastapqy tólem mólsherin arttyrýǵa múmkindik berýdi kózdeıdi.

Bılik bul ózgerister jalǵa beriletin turǵyn úı naryǵyna kóbirek menshik ıesin tartýǵa jáne usynysty arttyrýǵa múmkindik beredi dep esepteıdi. Al qoǵamdyq uıymdar daǵdarys odan ári ýshyǵýy múmkin ekenin eskertedi.

Málimetterge sáıkes, 2015-2025 jyldary Portýgalııada jyljymaıtyn múlik baǵasy 147 paıyzǵa ósken. Bul – Eýropadaǵy úshinshi kórsetkish. Odan joǵary ósim Majarstan men Lıtvada tirkelgen. Al 2020 jyldan beri jaldaý aqysy 68 paıyzǵa qymbattaǵan.

Ásirese Lıssabonda jaǵdaı kúrdeli. Deutsche Bank zertteý ınstıtýtynyń baǵalaýynsha, jergilikti úı sharýashylyqtarynda jaldaý aqysyn tólegennen keıin aıyna orta eseppen 253 eýro ǵana qalady.

Sarapshylar baǵanyń ósýine sheteldik ınvestıtsııalardyń kóbeıýi, týrızmniń damýy jáne qysqa merzimdi jalǵa berý qyzmetiniń keń taralýy áser etip otyrǵanyn aıtady.

Máseleni sheshý úshin úkimet qurylys salasyn yntalandyryp, 145 myń jańa turǵyn úı salýdy josparlap otyr. Alaıda bul sharalardyń naqty nátıjesi birden baıqalmaıdy.

Aıta keteıik, buǵan deıin Barselonada baspananyń qymbattaýyna qarsy narazylyqtan keıin jappaı tártipsizdik bolǵan edi.