Jappaı qyrylǵan kıikterden pasterellez aýrýynyń qozdyrǵyshy tabylǵan
ASTANA. QazAqparat - Búgin Úkimet úıinde QR Premer-Mınıstriniń birinshi orynbasary Baqytjan Saǵyntaev betpaqdala kıikter popýlıatsııasynyń jappaı qyrylý jaǵdaıyna qatysty usynystardy qarastyrý úshin jumys tobynyń otyrysyn ótkizdi, dep habarlaıdy QR Premer-mınıstriniń baspasóz qyzmetinen.
Otyrysqa birqatar mınıstrlikterdiń, ákimdikterdiń, ǵylymı uıymdardyń, úkimettik emes uıymdardyń ókilderi men táýelsiz sarapshylar qatysty. Aǵymdaǵy jyldyń 2 maýsymyndaǵy jaǵdaı boıynsha betpaqdala popýlıatsııasynda 132 329 kıik, sonyń ishinde Qostanaı oblysynda -113 309, Aqmola oblysynda - 9 386, Aqtóbe oblysynda - 9 634 kıik qyryldy. Janýarlardyń taǵy qyrylý oqıǵalary ázirge tirkelmedi. Kıikterdiń óli deneleri tabylǵan jerlerde mamandandyrylǵan zerthanalar men ǵylymı uıymdardyń mamandary zerthanalyq jáne ǵylymı zertteýler úshin qyrylǵan janýarlardyń patologııalyq materıaldaryn, jer topyraǵyn, sý, ósimdikter synamalaryn aldy. Veterınarııa boıynsha Ulttyq referentti ortalyqtyń aqparatynsha, olardan pasterellez aýrýynyń qozdyrǵyshy tabylǵan. Sheteldik sarapshylar kelesi aptada óz zertteýleriniń aldyn-ala nátıjelerin usynýdy josparlap otyr. Óz kezeginde Investıtsııa jáne damý mınıstrliginiń Aeroǵarysh komıteti bókenderdiń qyrylýy zymyran-ǵaryshtyq qyzmetke baılanysty bolýy múmkin emes ekendigine derekter keltirdi, óıtkeni kıikter qyrylǵan aýmaqtarda zymyran otyny qaldyqtarymen zymyran tasyǵyshtyń bólikteri qulaǵan emes. Otyrys nátıjesi boıynsha Baqytjan Saǵyntaev Aýyl sharýashylyǵy mınıstrligine ákimdiktermen birlesip, jaǵdaıǵa monıtorıng júrgizýdi, qyrylǵan janýarlardy joıý boıynsha jumystardy jalǵastyrýdy, ǵylymı maqsatta paıdalanǵandy qospaǵanda, Qazaqstannyń barlyq aýmaǵynda kıikterdi aýlaýǵa salynǵan tyıymdy uzartý týraly sheshim daıyndaýdy tapsyrdy. Bilim jáne ǵylym mınıstrligine kıikter popýlıatsııasyna jerseriktik monıtorıng júrgizý, ekspedıtsııalyq topqa betpaqdalada atalǵan janýarlardyń qystaıtyn, tóldeıtin oryndaryndaǵy, jazǵy jaılaýyndaǵy sýdy, aýany, topyraqty, ósimdikterdi zertteýdi uıymdastyrýdy tapsyrdy. Budan basqa, bıologııalyq qaýipsizdik problemalary ǴZI bazasynda kıikterdiń aýrýlaryn zerdeleý, onyń aldyn alý jáne emdeý ádisterin ázirleý jónindegi ortalyq (tálimbaq) qurý máselesin qaraýdy tapsyrdy. Jumys toby apta ishinde Úkimettiń odan ári qaraýy úshin óz usynystaryn pysyqtaıdy.
