Jappaı qýǵyn-súrgin jyldary 1 mıllıonnan astam adam Qazaqstanǵa kóshirildi – tarıhshy
«Respýblıkalyq semınardyń bizdiń jumys tobymyzǵa arnalǵany - biz úshin úlken jaýapkershilik. Biz Qazaqstan táýelsizdik alǵanyna, sodan keıin deportatsııalanǵan halyqtardy aqtaýǵa jol ashylǵanyna óte qýanyshtymyz. Bul shyn máninde elimizdiń óte izgilikti mańyzdy qadamy jáne Elbasy men Prezıdent Qasym-Jomart Toqaevqa osyndaı jumys tobynyń tolyq aqtaý boıynsha jumys istep jatqany úshin óte rızamyz. Óıtkeni mundaǵy negizgi sóz – tolyq aqtap shyǵarý. Búgingi tańda biz ortalyq memlekettik arhıvtiń qujattaryna taldaý jasadyq. Ortalyq memlekettik arhıvtiń 13 qorynda myń jarymǵa jýyq iste deportatsııalanǵan halyqtar týraly materıaldar bar ekenin aıta alamyn. Bul, árıne eń aldymen Halyq Komıssarlary Keńesiniń, NKVD-nyń qonys aýdarý bóliminiń, halyq komıssarıatynyń qonys aýdarý bóliminiń jáne basqalardyń materıaldary», - dedi G. Kan Qazaqstanǵa kúshtep jer aýdarylǵan halyqtar men arnaıy qonys aýdarǵandar jóninde materıal jınaý boıynsha tájirıbe almasý semınarynda.
Onyń aıtýynsha, materıalda joǵaryda atalǵan qujattardyń tolyq sıpattamasy berilgen.
«Qazirgi ýaqytta qujattardyń sıpattamasy júıelengen, Prezıdent arhıvi tsıfrlandyrylǵan. Biz óz materıalymyzda tsıfrlandyrylǵan derekterden 9 jınaq beremiz. Onda nemister, kárister, sheshender, ıngýshter jáne polıaktar boıynsha aqparat bólek-bólek berilgen. Qalǵandary – jıyntyq qujattar. Sondyqtan búgingi kúni bul másele qujattar boıynsha zerdelendi. 1 053 525 adam. Bul sandar arhıv qujattary boıynsha shyǵaryldy. Arhıv qujattary boıynsha jappaı qýǵyn-súrgin jyldary Qazaqstanǵa 1 053 525 adam jer aýdaryldy», - dep tolyqtyrdy Georgıı Kan.